काठमाडौं । नेपाल ‘ए’ले अस्ट्रेलियामा जारी टप एन्ड टी–२० सिरिजमा किंग्समेन एकेडेमीसँग ३१ रनको हार व्यहोरेको छ।
यो हारसँगै नेपालको सेमिफाइनल पुग्ने सम्भावना लगभग समाप्त भएको छ। तेस्रो हार व्यहोरेको नेपाल पाँच खेलबाट चार अंकसहित सातौँ स्थानमा छ। जितसँगै किंग्समेन समान खेलबाट ६ अंक जोडेर तेस्रो स्थानमा उक्लिएको छ।
बिहीबार डार्विनस्थित मरारा क्रिकेट मैदानमा किंग्समेनले दिएको १९८ रनको लक्ष्य पछ्याएको नेपाल १९.२ ओभरमा १६६ रनमै अलआउट भयो।
नेपालका लागि कुशल भुर्तेलले सर्वाधिक ६६ रन बनाए। उनले ४६ बलमा ६ चौका र ४ छक्का प्रहार गरे। लोकश बमले ३८, नारायण जोशीले १२, रासिद खान र कप्तान अनिलकुमार साहले समान ११ तथा विपीन खत्रीले १० रन बनाए।
किंग्समेनका स्कट कुगेलाइन र उस्मान मिरले तीन–तीन विकेट लिए। अली शेखले दुई तथा उमर खान र कप्तान हम्माद अजामले एक–एक विकेट लिए।
त्यसअघि टस हारेर ब्याटिङ गरेको किंग्समेनले निर्धारित २० ओभरमा पाँच विकेट गुमाउँदै १९७ रन बनाएको थियो। उसका सेहन जयसूर्याले सर्वाधिक ६७ रन बनाए। उनले ४४ बलमा ५ छक्का र ४ चौका प्रहार गरे।
सेहन जहान्गिरले २७, हम्माद अजामले अविजित २६, मिलिन्द कुमारले २५, तैयब आरिफले २३ तथा अली शेखले २२ रन बनाए।
नेपालका नारायण जोशीले दुई तथा रासिद खान, पवन सराफ र कुशल भुर्तेलले एक–एक विकेट लिए।
नेपाल सुरुआती दुई खेलमा नर्दन टेरिटोरी स्ट्राइक र बंगलादेश हाई पर्फर्मेन्स टोलीसँग पराजित भएको थियो। त्यसपछि होबर्ट हरिकेन्स एकेडेमी र अस्ट्रेलिया क्यापिटल टेरिटोरीलाई हराएको थियो।
किंग्समेनले भने पहिलो खेलमा अस्ट्रेलिया क्यापिटल टेरिटोरीलाई हराएपछि भिक्टोरिया क्रिकेट संघ र नर्दन टेरिटोरीसँग पराजय व्यहोरेको थियो। पछिल्लो खेलमा उसले न्युजिल्यान्ड ‘ए’लाई पराजित गरेको थियो।
प्रकाशित मिति: बिहीबार, भदौ ११, २०८३
-1787133994.jpg)
-1787729040-1787822224.jpeg)
-1787729040-1787815274.jpeg)