काठमाडौं । टप एण्ड टी–२० शृंखलाको तेस्रो खेलमा नेपाल ‘ए’ ले होर्बट हुरिकेन्स एकेडेमीलाई १५५ रनको लक्ष्य दिएको छ।
अष्ट्रेलियाको डार्विनस्थित मर्रारा क्रिकेट मैदानमा टस हारेर पहिले ब्याटिङ गरेको नेपाल ‘ए’ ले निर्धारित २० ओभरमा १५४ रन बनाएको हो।
नेपाल ‘ए’ का लागि वान डाउनमा ब्याटिङ गरेका कुशल भुर्तेलले सर्वाधिक ३९ रन बनाए। उनले ३४ बलमा ६ चौका प्रहार गरे। कुशलले ओपनर मयन यादवसँग दोस्रो विकेटका लागि ५२ रनको साझेदारी गरेका थिए।
मयनले २५ बलमा ४ चौकासहित ३१ रन बनाए। उनी कट एन्ड बोल्ड आउट भए। अर्का ओपनर तृतराज दासले १० रन बनाए।
कप्तान अनिल कुमार शाहले २८ रन बनाएर क्याच आउट भए। त्यसपछि नेपाल ‘ए’ ले लगातार विकेट गुमायो। पवन सर्राफ, नारायण जोशी, विपिन खत्री र युवराज खत्री सस्तैमा आउट भए।
लोकेश बमले २० रन बनाए भने साहब आलम १ रनमा अविजित रहे।
होर्बट हुरिकेन्स एकेडेमीका लागि राफ म्याकमुलेनले सर्वाधिक ३ विकेट लिए। मार्कस विन्सले २ तथा ब्राड्ले होप र निवेथनराधाकृष्णनले १–१ विकेट लिए।
नेपाल ‘ए’ ले यसअघि प्रतियोगिताको पहिलो खेलमा आयोजक एनटी स्ट्राइकसँग ८ विकेट तथा दोस्रो खेलमा बंगलादेश हाई पर्फमेन्स–११ सँग ९ विकेटको हार बेहोरेको थियो।
प्रकाशित मिति: सोमबार, भदौ ८, २०८३
-1787133994.jpg)
