काठमाडौं । नेपाल ‘ए’ले अस्ट्रेलियामा जारी टप एन्ड टी–२० सिरिजको सुरुआत हारबाट गरेको छ। शुक्रबार डार्विनस्थित मरारा क्रिकेट मैदानमा आयोजक नर्दन टेरिटोरी (एनटी) स्ट्राइकले नेपाल ‘ए’लाई ८ विकेटले पराजित गरेको हो।
नेपालले दिएको १२१ रनको लक्ष्य एनटी स्ट्राइकले १५ ओभरमा दुई विकेट गुमाएर पूरा गर्यो। एनटीका डाउट्जी हुगेनबोएजेमले अविजित ५० रन बनाए। उनले ३७ बलमा चार चौका र एक छक्का प्रहार गरे। यस्तै जोर्डन सिल्कले अविजित ४२ तथा कप्तान डार्सी सर्टले २३ रनको योगदान गरे।
नेपालका लागि पवन सराफले एनटीका दुवै विकेट लिए।
यसअघि टस हारेर पहिले ब्याटिङ गरेको नेपाल ‘ए’ले निर्धारित २० ओभरमा आठ विकेट गुमाउँदै १२० रन बनाएको थियो। नेपालका लागि पवन सराफले सर्वाधिक ४१ रन बनाए। उनले ४९ बलमा तीन चौका र एक छक्का प्रहार गरे।
त्यस्तै लोकश बमले १६, नारायण जोशीले १५, कप्तान अनिलकुमार साहले १४, तृतराज दासले १३ तथा रासिद खानले १० रन बनाए।
एनटीका हामिश मार्टिनले तीन विकेट लिए। टम मोन्जिस, विलियम ब्लेयर, साम बार्कर र डार्सी सर्टले समान एक–एक विकेट लिए।
नेपाल ‘ए’ले अब सिरिजको दोस्रो खेलमा शनिबार बंगलादेश हाई पर्फमेन्स टोलीसँग प्रतिस्पर्धा गर्नेछ।
प्रकाशित मिति: शुक्रबार, भदौ ५, २०८३
-1768560081-1787310199.jpg)
-1787133994.jpg)
