काठमाडौं : नेपाली प्रतिभा प्रतिष्ठान, बेलायतले प्रत्येक वर्ष आयोजना गर्दै आएको नियमित सिर्जना वाचन कार्यक्रम ‘अभिव्यक्ति’को १२औँ शृङ्खलामा कवि तथा गीतकार जानु काम्बाङ लिम्बूलाई प्रस्तुत गर्ने भएको छ ।
प्रतिष्ठानकी अध्यक्ष दीपा लिम्बू राईको अध्यक्षतामा हालै बसेको बैठकले सो निर्णय गरेको हो । शृङ्खला आगामी सेप्टेम्बर १४ का दिन बेलायतको हाइवेकम, मिडल्याण्डमा आयोजना गरिने प्रतिष्ठानले एक प्रेस विज्ञप्ति जारी गरी जानकारी गराएको छ । उक्त शृङ्खला बेलायतका स्रष्टामाझ निकै महत्त्वपूर्ण र लोकप्रिय मानिन्छ ।
ताप्लेजुङ स्थायी घर भएकी कवि तथा गीतकार लिम्बू बेलायतमा साधनारत सक्रिय स्रष्टा हुन् । गीत, कविता, कथा, नियात्रा, मुक्तक र गजल विधामा सशक्त रूपमा कलम चलाउँदै आएकी उनका ‘शिविरमा ईश्वर’ कविताकृति, ‘अनुभव’ र ‘जानु’ गीति एल्बम र ‘नउघ्रेको जून’ कथासङ्ग्रह प्रकाशित छन् । उनका गीत, नियात्रा र उपन्यास कृति प्रकाशोन्मुख छन् । बाल्यकालदेखि नै साहित्यमा रुचि राख्ने जानुका दर्जनौँ सिर्जनाहरू बेलायत तथा नेपालबाट निस्किने विभिन्न पत्रपत्रिकामा प्रकाशन हुँदै आएका छन् । उनका दर्जनौँ गीत चर्चित छन् । अनेकन सामाजिक सङ्घसंस्थामा आवद्ध उनी बेलायतमा पत्रकारितासमेत गर्छिन् ।
स्थापनाकालदेखि नै प्रतिभा प्रतिष्ठानले निमियत रूपमा हरेक वर्ष गर्दै आएको ‘अभिव्यक्ति शृङ्खला’मा यसअघि चोक गुरुङ, दयाकृष्ण राई, टंक वनेम, किशोर गुरुङ, अञ्जु अञ्जलि, नोर्देन तेन्जिङ भुटिया, शशि थापा सुब्बा, रक्ष राई, निर्मला परिवेश राई, डा. रूपक श्रेष्ठ र गणेश राई प्रस्तुत भइसकेका छन् ।
-1732776560.jpg)
