ओस्लो ः नर्वेको तटीय इलाकामा खराब मौसम र इन्जिनमा समस्या आएपछि अलपत्र परेको यात्रुबाहक पानीजहाजबाट १ हजार ३ सयभन्दा बढी यात्रु र चालक दलका सदस्यलाई सकुशल उद्धार गरिएको छ ।
पानीजहाजमा यात्रारत व्यक्तिहरूले शनिबार दिउँसो खिचेको भिडियोमा उक्त जहाज समुद्रमा ढलपल गरेको र मुस्किलले डुब्नबाट जोगिएको देखिएको थियो । नर्वेका उद्धारकर्मीहरूले तत्कालै हेलिकोप्टर र अन्य जहाजको सहायताबाट उद्धारकार्य थालेका थिए ।
भाइकिङ स्काई कम्पनीको उक्त पानीजहाजमा विद्युत् आपूर्ति बन्द भएको थियो । नर्वेको उत्तरी ट्रोम्सोबाट ओस्लोतर्फ आउँदै थियो । मोर ओग रोम्सडालबाट करिब २ किलोमिटर अगाडि बढ्नासाथ इन्जिनमा समस्या आएको चालक दलका क्याप्टेनले सूचना पठाएका थिए ।
विषम मौसमी अवस्था आए पनि उद्धारकर्मीहरूले हेलिकोप्टरको प्रयोग गर्ने निष्कर्षमा पुगेका थिए । प्रहरी प्रमुख टोर आन्द्रे फ्रान्कले भने, दुर्घटनाको संघारमा पुगेको जहाजमै यात्रुलाई छाड्नुभन्दा जसरी पनि उनीहरूलाई जमिनमा ल्याउनु बुद्धिमानी सम्झेर हामीले निकै चुनौतीबीच उद्धारकार्य थालेका हौं ।
आइतबार बिहानसम्म पानीजहाजका चारमध्ये ३ वटा इन्जिन पुनः चलाउन सफल भएका थिए ।
अधिकारीहरूले उद्धार गरिएकामध्ये १७ जनालाई अस्पताल भर्ना गरिएको छ । उद्धारका लागि ५ वटा हेलिकोप्टर र अरू जहाज प्रयोग गरिएका थिए ।
प्रकाशित मिति: सोमबार, चैत ११, २०७५
-1732776560.jpg)
