सियोल : अर्धसुचालक तथा पेट्रोकेमिकल सामग्रीका लागि अत्यधिक निर्भरताका कारण ओइसीडी सदस्य राष्ट्रका अन्य मुलुकको तुलनामा दक्षिण कोरियाको निर्यात दरमा भारी गिरावट आएको आइतबार सार्वजनिक एक तथ्याङ्कले देखाएको छ ।
आर्थिक सहयोग तथा विकास संगठन (ओइसीडी)द्वारा सङ्कलन गरिएको तथ्याङ्कअनुसार दक्षिण कोरियाको निर्यात दरमा अघिल्लो वर्षको तुलनामा गत जनवरीमा ५.९ प्रतिशतले कमी आएको पाइएको छ । पछिल्लो मूल्याङ्कनअनुसार ओइसीडीका ३२ सदस्य राष्ट्रमध्ये निर्यातका वृद्धिदरका हिसाबले दक्षिण कोरिया २६ स्थानमा पुगेको छ ।
यस्तै, ठूला तथा विकसित अर्थतन्त्र भएका १९ मुलुकसहित युरोपेली युनियनको समूह, जी–ट्वान्टीमध्येका १७ मुलुकमा दक्षिण कोरिया १५ स्थानमा पुगेको तथ्याङ्कमा उल्लेख छ ।
दक्षिण कोरियाको विदेश निर्यात हुने सामानमा ११.१ प्रतिशतले कमी आएपछि निर्यात दरमा फेब्रुअरीमा थप गिरावट आएको बताइएको छ ।
दक्षिण कोरियाको निर्यातमा फेब्रुअरीमा समेत सुधार आउन नसकेको र लगातार तेस्रो महिनासम्म निर्यात दरमा कमजोर बनेको छ । गत वर्षको डिसेम्बरमा दक्षिण कोरियाको निर्यात दरमा १.७ प्रतिशतले कमी आएको थियो । निर्यात दरमा देखिएको गिरावटको कारण विश्व बजारको व्यापारमा देखिएको आधारभूत असर तथा दक्षिण कोरियाली सामानको मूल्य खासगरी मोबाइललगायतका विद्युतीय सामानमा आएको गिरावट जिम्मेवार भएको तथ्याङ्कबाट देखिएको छ ।
दक्षिण कोरियाको केन्द्रीय बैंकका एक अधिकारीले भने, विश्व व्यापारमा देखिएको मन्दीका समय दक्षिण कोरियाको निर्यात अन्य विकसित मुलुकको तुलनामा निकै उच्च गिरावट देखिएको हो । दक्षिण कोरियाको विद्युतीय तथा अन्य प्रविधिजन्य सामानको चिप्सका लागि अन्य मुलुकसँग निर्भरता रहने गर्छ, जसका कारण विदेशी भूमिमा पर्ने प्रभावको असर सियोलले पनि सामना गर्ने गरेको छ ।
चीन–अमेरिका व्यापार विवादका कारण विश्वव्यापी प्रभावसहित पानीजहाज र रसायनिक सामानको निर्यातमा पनि अपेक्षाकृत परिणाम प्राप्त गर्न नसक्नु पनि निर्यात दरमा देखिएको कमजोर अवस्थाका कारक रहेका उनले बताए ।
जनवरीको परिणाम हेर्दा अघिल्लो वर्षको समग्र कारोबारभन्दा चिप्सको व्यापारमा २३.३ प्रतिशतको कमी देखिएको थियो भने पानीजहाजका सामान तथा पेट्रोकेमिकलजन्य सामनमा क्रमशः १७.८ र ४.८ प्रतिशतले गिरावट आएको थियो ।
उनले भने, तर हामीले चिप्सको समुद्रपारको बजार र नयाँ पानीजहाजको मागलाई सतर्कतासाथ सम्बोधन गर्दै निर्यात बजारलाई सुधारतर्फ लाने प्रयास भइरहेको छ ।
-1732776560.jpg)
