वासिङ्टन ः अमेरिकी विदेशमन्त्री माइक पोम्पेओले अमेरिका उत्तर कोरियासँग पुनः वार्तामा बस्न सक्ने बताएका छन् । उनले एक अमेरिकी रेडियो अन्तर्वार्ता क्रममा अमेरिकाले उत्तर कोरियाली नेता किम जोङ उनसँग पुनः वार्ता गर्न सक्ने बताएको जनाइएको छ ।
उत्तर कोरियाको नि:शस्त्रीकरणको विषय अमेरिका र उत्तर कोरियाबीचको आपसी चासोको विषय भएकोले उत्तर कोरियासँग अमेरिकाको चासो रहिरहेको र यस विषयमा आवश्यकताअनुसार पुनः वार्ता गर्ने उनको धारणा थियो ।
अमेरिकाको ‘बि ९८ एफएम’सँगको अन्तर्वार्तामा विदेशमन्त्री पोम्पेओले भने, हामीलाई विश्वास छ कि हामी यस विषयमा प्रतिक्षामा छौं र उत्तर कोरियाले यस विषयमा गरेका प्रतिबद्धता पालना गर्ने विश्वासमा छौं । हामीले इतिहासमा नै सबैभन्दा गाह्रो आर्थिक नाकाबन्दी पनि लगाएका छौं र हामीले इतिहासकै सबैभन्दा महत्त्वपूर्ण कूटनीतिक वार्ता पनि गरेका छौं।’
हनोइमा अमेरिका र उत्तर कोरियाबीचमा भएको उच्चस्तरीय वार्तामा केही प्रगति भएको धारणा राखे । उत्तर कोरियाको आणविक कार्यक्रम यस दशककै गाह्रो विषय भएकोले यसमा अरू केही वार्ता पनि गर्नुपर्ने हुन सक्ने उनको भनाइ थियो ।
उनले भने, ‘सिंगापुरमा गत वर्ष भएको वार्तापछि केही साताअघि भियतनामको हनोइमा महत्त्वपूर्ण वार्ता भयो र त्यहाँ थोरै मात्र भए पनि प्रगति भएको छ, यसलाई हामी आगामी दिनका लागि पनि निरन्तरता दिन चाहन्छौं ।’
केही दिनअघि अमेरिकी राष्ट्रिय सुरक्षा सल्लाहकार जोन बोल्टनले समेत उत्तर कोरियाले आणविक कार्यक्रम त्यागेर नि:शस्त्रीकरणमा नगए संयुक्त राज्य अमेरिकाले पनि उसमाथि नाकाबन्दी लगाउने बताएका थिए ।
उनले नि:शस्त्रीकरणको विषयमा उत्तर कोरिया के कति गम्भीर छ भनेर अमेरिकाले हेरिरहेको बताइरहेका बेला सोमबार अमेरिकी विदेशमन्त्रीको यो धारणा आएको छ ।
अमेरिका र उत्तर कोरियाबीच गत वर्ष भएको पहिलो चरणको शिखर वार्तामा उत्तर कोरिया नि:शस्त्रीकरणको विषयमा सहमत भएको बताइएको थियो ।
तर पनि उत्तर कोरियालाई आणविक शस्त्र मुक्त बनाउने पक्षमा भने कुनै काम नभएको अमेरिकाको आरोप छ । तर आफूहरू सोही प्रक्रियामा भएको उत्तर कोरियाको भनाइ छ ।
अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच गत फेब्रुअरीको २७ र २८ तारिखमा भियतनामको हनोइमा दोस्रो चरणको वार्ता भएको थियो ।
सो शिखर वार्तामा कुनै उल्लेखनीय विषयमा सहमति नभएको बताइएको थियो । तर हनोइ वार्ता सकारात्मक र प्रगतिउन्मुख रहेको अमेरिकी राष्ट्रपति डोनाल्ड ट्रम्पले प्रतिक्रिया दिएका थिए ।
उनीहरूबीच पहिलो चरणको वार्ता गत वर्षको जुन महिनामा सिंगापुरमा भएको थियो । सो वार्तामा नि:शस्त्रीकरणको प्रतिबद्धता अघि सारेको उत्तर कोरियाले भने सोही बमोजिम काम गरिरहेको बताइरहेको छ ।
प्रकाशित मिति: मंगलबार, चैत ५, २०७५
-1732776560.jpg)
