म्याग्दी : भ्यालेन्टाइन डे अर्थात् प्रणय दिवस सुरु भएपछि म्याग्दीको नयाँ पर्यटकीयस्थल मायालु डाँडा (लभ्ली हिल)मा प्रेमिल माहोल देखिन थालेको छ ।
सदरमुकाम बेनी बजारदेखि नजिकै बेनी नगरपालिका- २ खबरामा अवस्थित मायालु डाँडामा अहिले युवायुवतीको भीड लाग्न थालेको हो । सदरमुकाम बेनीबजारदेखि करीब आधा घण्टाको दूरीमा रहेको उक्त डाँडामा केही दिनयता युवायुवती आउने क्रममा उल्लेख्य वृद्धि भएको स्थानीयवासी चन्द्रबहादुर कार्कीले बताए ।
हिजोआज म्याग्दीका साथै अन्य जिल्लाबाट आएका व्यक्ति र विदेशीको समेत यहाँ भीड लाग्न थालेको उनको भनाइ थियो । विगतमा खाजाका विभिन्न परिकार बोकेर आउने युवायुवती भ्यालेन्टाइन डेको माहोल सुरु भएपछि गुलाब र विभिन्न जातका फूलसमेत लिएर एकआपसमा साटासाट गरेका दृश्य देखिने गरेको लम्भी हिल हरितपार्क निर्माण समितिका अध्यक्ष हरिलाल घिमिरेले जानकारी दिए ।
‘विभिन्न आधुनिक पोसाकमा सजिएर मोटरसाइकल, स्कुटीलगायत सवारी साधनमा यहाँ आउने युवायुवतीको संख्या पहिलेको तुलनामा केही दिनयता झन वृद्धि हुँदै गएको छ’, उनले भने, ‘युवायुवतीको संख्या वृद्धिसँगै यहाँका कृषि उपज र फलफूलको पनि व्यापार बढेको छ ।’
मायालु डाँडामा रेलिङ, गोलघर, खाजाघरलगायतका पूर्वाधार निर्माण गरिएपछि पर्यटकको आकर्षण बढ्दै गएको हो । साविकको ज्यामरुककोट गाविसमा पर्ने खबरा गाउँ नजिकै रहेको ‘खाराको डाँडो’ अहिले मायालु डाँडामय बन्न पुगेको छ ।
म्याग्दी सदरमुकाम बेनी बजारदेखि नजिकै रहेको पर्यटकीय गन्तव्यको सम्भावना बोकेको उक्त डाँडामा अहिले दिनहुँजसो सयौँको संख्यामा आन्तरिक पर्यटकको चहलपहल बढेको छ । ससाना बालबालिकादेखि पाका उमेरका मानिस त्यहाँ पुग्ने गरेका छन् । मायालु डाँडाको डिलबाट सुन्दर र आकर्षक देखिने बेनी बजारलाई पिठ्युँमा पारेर फोटो खिच्नेहरूको ओइरो नै लाग्ने गरको छ ।
त्यहाँबाट चारैतिरको दृश्य अवलोकन गर्न सकिने र गर्मीयाममा शीतलताको खोजीमा मानिस आउने गरेको स्थानीयवासीले बताए । पहिले केही सीमित मानिस पुग्ने ठाउँ पछिल्लो पटक मायालु डाँडामा परिणत भएपछि समूह समूह बनाएर दैनिक युवापुस्ताको भीड लाग्ने गरेको छ । अन्य बेलासमेत त्यहाँ मानिसको उपस्थिति देखिन्छ भने बिदा र शनिबारको दिनमा त झनै भीडै लाग्ने गरेको छ । प्रायः कलेज पढ्ने उमेरका युवायुवती मायालु डाँडामा देखिन्छन् ।
प्रवासी म्याग्देलीलाई साझेदार बनाएर नयाँ अवधारणाअनुसार हाँडेभीर–बेनी जोड्ने म्याग्दी नदीको पुल नजिकैबाट पदमार्ग निर्माण थालिएको छ । पदमार्ग निर्माण भएपछि मायालु डाँडामा पुख्ने आन्तरिक तथा बाह्य पर्यटकको सङ्ख्या तीन गुणाले बढ्ने अपेक्षा गरिएको वडा नं.- २ का वडाध्यक्ष हीराबहादुर थापाले बताए ।
म्याग्दी भ्रमण वर्ष २०७५ को अवसर पारेर सरकारी निकाय, निजी क्षेत्र र प्रवासी म्याग्देलीको संयुक्त साझेदारीमा पर्यटन पूर्वाधार योजनाअन्तर्गत पदमार्ग निर्माण गर्न लागिएको म्याग्दी उद्योग वाणिज्य संघका अध्यक्ष उत्तमकुमार कर्माचार्यले जानकारी दिए । कूल ५७ लाख आठ हजार २६० रुपैयाँ लागत अनुमान गरिएको पदमार्ग निर्माणमा बेनी नगरपालिका, मोना र उद्योग वाणिज्य संघले क्रमशः ५०, ४० र १० प्रतिशत लगानी गर्ने गरी यसअघि नै समझदारीपत्रमा हस्ताक्षरसमेत गरिसकिएको छ ।
बेनीदेखि आधा घन्टाको दूरीमा रहेको मायालु डाँडाबाट बेनी बजार, गलेश्वर, पौलस्त्य आश्रम, पुलाचौर, भकिम्लीको स्वर्गाश्रम, पर्वत बेनी र मल्लाजलगायत क्षेत्र देख्न सकिन्छ ।
यसैगरी म्याग्दी जिल्लाको अधिकांश भूभागका साथै उत्तरी पर्वतको जलजला गाउँपालिकासहित संसारको सातौँ अग्लो चुचुरो धौलागिरि, अन्नपूर्ण हिमाल तथा सूर्योदय र सूर्यास्तका साथै बेनी बजार आसपासका क्षेत्रबाट बग्ने म्याग्दी र कालीगण्डकी नदीको बहावलगायत आकर्षक दृश्य अवलोकन गर्न सकिन्छ ।
केही वर्षयता दैनिकजसो समूह बनाएर घुम्न जाने मायालु डाँडालाई आन्तरिक तथा बाह्य पर्यटकको रोजाइमा पर्नेगरी पर्यटकीय गन्तव्य बनाउनुपर्ने जिल्लाका पर्यटन व्यवसायीले माग गरेका छन् । त्यहाँ पुग्नका लागि पदमार्ग, रेष्टुराँ, भ्यूटावर, स्विमिङ पुललगायत बालबालिकादेखि वृद्धवृद्धासम्मलाई रमाउनेस्थलका रूपमा स्थापित गर्नसके पर्यटन व्यवसायसमेत फस्टाउने बताइन्छ ।
मायालु डाँडामा आव २०७३/७४ मा पर्यटन कार्यालय पोखरा, बेनी नगरपालिकाको आर्थिक सहयोग र स्थानीयबासीको श्रमदानमा भौतिक पूर्वाधारको विस्तार गरिएको लभ्ली हिल पर्यटन पूर्वाधार विकास उपभोक्ता समितिले जनाएको छ । कूल १२ लाख रुपैयाँको लागतमा लभ्ली हिलमा गोलघर (भ्यू प्वाइन्ट), रेलिङ र बस्नका लागि आरामदायी बेन्चलगायत पूर्वाधारको निर्माणसँगै त्यहाँ पुग्ने पर्यटकको संख्यामा वृद्धि भएको हो ।
साँघुरो बेनी बजारमा युवायुवती र वृद्धवृद्धाका लागि रमाउने र आराम गर्ने ठाउँको अभाव खड्किरहेको अवस्थामा मायालु डाँडामा भौतिक पूर्वाधार निर्माणसँगै उचित वातावरणको व्यवस्था गर्न सक्ने हो भने यहाँ आन्तरिक तथा बाह्य पर्यटकको आगमनमा वृद्धि हुने स्थानीयबासी बताउँछन् ।
कृषि गाउँका रूपमा परिचित खबरा र प्राकृतिक दृश्यावलोकनका लागि अतिउपयुक्त स्थान मायालु डाँडामा ‘भ्यालेन्टाइन डे’का अवसरमा मात्र होइन, सधैँभरि पर्यटकलाई आकर्षित गर्ने उद्देश्यले यहाँ हरित पार्क निर्माण गर्न लागिएको समितिका अध्यक्ष ध्रुवराज कार्कीको भनाइ थियो ।
हरितपार्क निर्माणसँगै विभिन्न सभा र सम्मलेलनका लागि उपयुक्त हुने सभाहलसमेत बनाउने योजनाबमोजिम नगरपालिकासँग समन्वय भइरहेको र सहयोगी अन्य संस्थाको पनि खोजी भइरहेको उनले जानकारी दिए ।
प्रकाशित मिति: बिहीबार, फागुन २, २०७५ ०८:१६
