काठमाडौं । नेपाली कांग्रेसका नेता गगन थापाले कोरोना भाइरसको संक्रमण भुसको आगोसरी भित्रभित्रै फैलिरहेका बेला सरकार सत्ता राजनीतिको घीनलाग्दो खेलमा फसेको आराेप लगाएका छन् ।
कोरोना भाइरस संक्रमण रोकथाम तथा नियन्त्रणका लागि प्रभावकारी काम गर्न नसकेको भन्दै पूर्वस्वास्थ्य मन्त्रीसमेत रहेका कांग्रेस सांसद थापाले सरकारको आलोचना गरेका हुन् ।
उनले सामाजिक सञ्जालमा लेखेका छन्, 'प्रधानमन्त्रीज्यू पार्टीको खिचातानीमा व्यस्त ! स्वास्थ्यमन्त्री गज्जबको काम गरेँ भन्दै भजन गाउन मस्त ! भुसको आगोझैँ संक्रमण फैलिएको छ, सरकार न परीक्षण बढाउँछ न अस्पताल केन्द्रित तयारी गर्छ । बालुवाटारको पर्खालभित्र निद्रामा मस्त सरकारलाई देख्ने र सुन्नेगरी भनौँ– अब त अति भो !'
प्रकाशित मिति: शुक्रबार, साउन १६, २०७७ ०९:११
