काठमाडौं । कालापानी र लिपुलेकलगायतको नेपाली भू–भागलाई भारतले आफ्नो नक्सामा समेटेको विरोधमा विद्यार्थीहरूले आज काठमाडौंस्थित भारतीय दूतावास अगाडि प्रदर्शन गरेका छन् ।
संयुक्त विद्यार्थी आन्दोलन समितले दूतावासको कार्यालय अगाडि भारतले सार्वजनिक गरेको नयाँ नक्सा जलाएर प्रदर्शन गरेकाे हाे । लैनचौरस्थित दूतावास कार्यालयअघि अनेरास्वियू, नेपाल विद्यार्थी संघलगायतका विद्यार्थी संगठनहरुले भारतीय नक्साको विरोधमा संयुक्त प्रदर्शन गरेका छन् ।
‘लिपुलेक हाम्रो हो’, ‘कालापानी हाम्रो हो’ लेखिएका प्लेकार्डसहित अस्कल क्याम्पसबाट सुरु विरोध र्याली भारतीय दूतावास कार्यालय अगाडि आएर कोणसभामा परिणत भएको थियो ।
यसैबीच पशुपति बहुमुखी क्याम्पस, चाबहिलका विद्यार्थीले पनि प्रदर्शन गरेका छन्। नेवि संघ काठमाडौं जिल्ला समितिको आयोजनामा आज गरिएको विरोध प्रदर्शनमा ‘हाम्रो सीमा हाम्रो देश प्राण भन्दा प्यारो छ’ भन्ने नारासहित नेपालको एक चिम्टी भू–भाग कसैले मिच्न नपाउने जस्ता नारा लगाइएको थियो।
प्रकाशित मिति: शुक्रबार, कात्तिक २२, २०७६ ०७:२८