काठमाडाैं । चिकित्सा शिक्षा आयोगले निर्देशक पद खुला प्रतिस्पर्धाबाट चयन गर्ने भएको छ । यसका लागि आयोगले आज सार्वजानिक सूचना जारी गरी पदमा आवश्यक योग्यता पुगेकालाई दरखास्त आह्वान गरेको छ ।
राष्ट्रिय चिकित्सा ऐन २०७५ ले आयोगमा ४ निर्देशक पदको व्यवस्था गरेको छ । आयोगको सूचना अनुसार निर्देशक पदमा आफ्नो व्यक्तिगत सोच, वैयक्तिक विवरणसहित यही कात्तिक २१ गतेसम्म विवरण बुझाउन भनिएको छ ।
ती ४ वटा निर्देशनालयमा मापदण्ड तथा प्रत्यायन, योजना समन्वय तथा प्राज्ञिक उन्नयन, परीक्षा निर्देशनालय र नेसनल बोर्ड अफ मेडिकल स्पेसियालिटिज छन् । ती पदका समयावधी चार वर्षको रहने ऐनमा नै उल्लेख भएको छ ।
ऐनमा ‘उपदफा ६ बमोजिम समितिले निर्देशनालय वा बोर्डको कामसँग सम्बन्धित दक्षता र कम्तीमा १५ वर्षको अनुभव प्राप्त प्राध्यापक वा नेपाल सरकारको विशिष्ट श्रेणीको पदमा अनुभव भएको, उत्कृष्ठ व्यवस्थापकीय सीप तथा कौशल, स्वच्छ छवि र व्यवसायिकता भएका व्यक्तिमध्येबाट उपयुक्त व्यक्तिलाई निर्देशक पदमा नियुक्तिका लागि सिफारिस गर्नेछ’ भनिएको छ ।
साथै ‘निर्देशक पदको नियुक्तिका लागि उपाध्यक्षसमक्ष नाम सिफारिस गर्न अध्यक्षले तोकेको राष्ट्रिय योजना आयोगको सदस्यको संयोजकत्वमा सम्बन्धित विषयका प्राध्यापक र कुनै एक विज्ञ रहेको ३ सदस्यीय सिफारिस समिति गठन हुने छ’, ऐनको प्रावधान छ ।
निर्देशक पदको नियुक्ति प्रक्रिया सुरु गरेको १५ दिनभित्र समितिले निर्देशकको नाम उपाध्यक्ष समक्ष सिफारिस गर्नुपर्ने उल्लेख छ । आयोगले सोमबार पूर्णता पाएको थियो । सरकारले आयोगका सदस्य मनोनयन गरेकोमा उपकुलपति मध्येबाट त्रिभुवन विश्व विद्यालय, पाटन स्वास्थ्य विज्ञान प्रतिष्ठान र बिपी कोइराला स्वास्थ्य विज्ञान प्रतिष्ठान छन् ।
स्वास्थ्य सम्बन्धी राष्ट्रिय तहका मेडिकल तथा नर्सिङलगायतका आधिकारिक पेसागत संगठनका अध्यक्षमध्येबाट अध्यक्ष एसाेसियसन अफ हेल्थ प्रोफेसन्स एजुकेसनिस्ट अफ नेपाल र नेपाल नर्सिङ सङ्घ रहेका छन् ।
यसैगरी आयोगका सदस्यमा नागरिक समाजका लब्ध प्रतिष्ठित कम्तीमा १ महिलासहित २ जनामा डा रमेशकान्त अधिकारी, डा गीता गुरुङ तथा चिकित्सा शिक्षा विज्ञमध्येबाट समावेशी सिद्धान्तको आधारमा कम्तीमा २ महिलासहित ३ जनामा प्रा डा दिव्यासिंह शाह, प्रा डा. शैंली प्रधान, प्रा डा जगदीश अग्रवाल छन् ।
प्रकाशित मिति: मंगलबार, कात्तिक १९, २०७६ ०९:५७
