काठमाडाैं । चिनियाँ राष्ट्रपति सी जिनपिङको नेपाल भ्रमणको क्रममा सुपुदर्गी सन्धिमा हस्ताक्षर नहुने भएको छ।
प्रधानमन्त्री केपी शर्मा ओलीले बिहीबार पूर्वप्रधानमन्त्रीहरू, पूर्वपरराष्ट्रमन्त्रीहरू र विदेश विज्ञहरूसँग बालुवाटारमा गरेको छलफलका क्रममा परराष्ट्रमन्त्री प्रदीपकुमार ज्ञवालीले नेपाल र चीनबीच सुपुर्दर्गी सन्धीमा हस्ताक्षर नहुने जानकारी दिएको बताइएको छ । मन्त्री ज्ञवालीले उक्त विषयमा दुवै देशका अधिकारीबीच छलफल जारी रहेकाले तत्काल हस्ताक्षर नहुने बताएका थिए।
छलफलमा सहभागी कांग्रेस नेता तथा पूर्वपरराष्ट्रमन्त्री प्रकाशशरण महतले सरकारले रेल, व्यापार र रोडका विषयमा सम्झौता गर्ने तयारी गरेको जानकारी दिएको बताए ।
छलफलमा चीनसँग सम्झौता हुने भनिएको बहुप्रतीक्षित रेल सम्झौताका विषयमा पनि चर्चा गरियाे । चीनले पनि राष्ट्रपति सीको नेपाल बसाइका क्रममा केरुङ–काठमाडौं रेल सम्झौता गर्ने विषयलाई प्राथमिकता दिएको छ ।
सीको नेपाल भ्रमणकै क्रममा सरकारले चीनसँग सुर्पुदगी सन्धिमा हस्ताक्षर गर्नेगरी मन्त्रीपरिषद्बाट स्वीकृत गरिसकेको छ। प्रधानमन्त्री केपी शर्मा ओलीको पछिल्लो चीन भ्रमण क्रममा जाहेर प्रतिबद्धताअनुसार सुपुर्दगी सन्धिमा हस्ताक्षरको तयारी भएको हो ।
चीनबाट रेल ल्याउन ऋणजालमा नफसौं : बाबुराम भट्टराई
छलफल क्रममा पूर्वप्रधानमन्त्री डा. बाबुराम भट्टराईले चीनबाट रेल ल्याउदा ऋणको जालमा नफस्न सरकारलाई सुुझाव दिएका छन् । परामर्शमा भट्टराईले रेलमार्ग बनाउँदा अनुदान र ऋणको सन्तुलन मिलाउन सुझाव दिएका हुन् ।
भट्टराईले चीनसँग रेलभन्दा सडक निर्माणमा जोड दिनुपर्ने बताए । डा. भट्टराईले प्रधानमन्त्रीले राखेको छलफलमा दिएको भन्दै ६ वटा सुझाव आफ्नो ट्विटरमार्फत सार्वजनिक गरेका छन् ।
चीन, भारत र अमेरिकासँग समानान्तर सम्बन्ध राख्ने, बेल्ट एन्ड रोड इनिसिएटिभ (बीआरआई) र इन्डो प्यासिफिक रणनीति दुबैबाट लाभ लिने, नेपाललाई भारत र चीनबीचको आर्थिक सेतुको रुपमा विकास गर्न सुझाव समेत दिएका छन् ।
प्रकाशित मिति: बिहीबार, असोज २३, २०७६ ०७:४९
