चित्रकलामा महिनावारीका पीडा (फोटो फिचर)

फिचर

विवश कुलुङ बुधबार, जेठ १५, २०७६ ००:१७

काठमाडौं : आज विश्व महिनावारी स्वच्छता दिवस । डे फर गर्ल्स नेपालको समन्वयमा विश्व महिनावारी दिवसको अवसरमा काठमाडौंका १२ वटा विद्यालयका किशोरीहरूले चित्रकला प्रदर्शनी गरेका छन् ।

महिनावारी समस्यालाई गहिरिएर अध्ययन गर्नुका साथै उचित व्यवस्थापनका लागि हरेक वर्ष मे २८ तारिखमा यो दिवस मनाउने गरिन्छ । सोही अवसरमा काठमाडौंका १२ वटा विभिन्न विद्यालयमा कक्षा ८ देखि १० सम्म अध्ययनरत ४८ किशोरीहरूले महिनावारीको पीडालाई चित्रमार्फत् प्रस्तुत गरेका हुन् ।

डे फर गर्ल्स नेपालले वसन्तपुर र जगलमा चित्रमार्फत् नेपालमा महिनावारीको नाममा हुने भेदभावलाई चित्रमा देखाएका हुन् । नेपालमा छाउपडीदेखि लिएर धार्मिक, सांस्कृतिक तथा विभिन्न कारणले भेदभाव भइरहेको हुँदा भेदभावले पारेका असरसँगै समाधानका कुरालाई समेत चित्रमार्फत् प्रष्ट पारेको र चित्रमार्फत् परिवर्तनको आवश्यकतालाई प्रष्ट पारिएको संस्थाकी कार्यकारी निर्देशक माया खाइतुले बताइन् ।

डे फर गर्ल्स नेपालले सुरक्षका साधनहरू र त्यसको प्रयोगबारे पनि प्रदर्शनीमा जानकारी गराएको छ । महिनावारी भएका महिलाका लागि आवश्यक स्वास्थ्य सुविधा र यससम्बन्धी गलत धारणा हटाउनका लागि चित्र प्रदर्शनी गरिएको संस्थाले जनाएको छ ।

विश्व महिनावारी दिवसको अवसरमा प्रदर्शन गरिएको उक्त प्रदर्शनी र महिनावारीको सरसफाइका सामग्रीहरूको अवलोकन खानेपानी तथा सरसफाइमन्त्री बिना मगरलगायत सयौँले गरेका छन् । कार्यक्रममा महिनावारी स्वच्छता व्यवस्थापनसँग सम्बन्धित भिडियो, पीएसए, खानेपानी तथा ढल व्यवस्थापन विभागले तयार पारेको ब्रोसर, जीआईजेडले तयार पारेको भिडियो, फ्लिप चार्ट, स्वच्छता तथा व्यवहार परिवर्तनसम्बन्धी तयार पारिएका अन्य सामग्रीहरूको समेत प्रदर्शन गरिएको स्वच्छता व्यवस्थापन सञ्जालका संयोजक गुणराज श्रेष्ठले बताए ।

हेर्नुहोस् फोटो :