काठमाडौं । नेपाल टेलिकमको आर्थिक वर्ष २०८२/८३ को चौथो त्रैमासिकसम्मको खुद मुनाफा ४७.५८ प्रतिशतले बढेको छ। कम्पनीले सार्वजनिक गरेको अपरिष्कृत वित्तीय विवरणअनुसार समीक्षा अवधिमा कम्पनीको खुद मुनाफा ८ अर्ब ८६ करोड ४६ लाख रुपैयाँ पुगेको हो।
गत आर्थिक वर्षको सोही अवधिमा कम्पनीको खुद मुनाफा ६ अर्ब ७० करोड ६७ लाख रुपैयाँ थियो। एक वर्षमा कम्पनीको खुद मुनाफा २ अर्ब १५ करोड ७९ लाख रुपैयाँले बढेको हो।
त्यस्तै, कम्पनीको कुल सञ्चालन आय पनि बढेको छ। आर्थिक वर्ष २०८२/८३ को चौथो त्रैमासिकसम्म कुल सञ्चालन आय ३४ अर्ब ९५ करोड ४ लाख रुपैयाँ पुगेको छ। यो गत आर्थिक वर्षको सोही अवधिको ३३ अर्ब ८९ करोड ४५ लाख रुपैयाँको तुलनामा १ अर्ब ५ करोड ५९ लाख रुपैयाँ अर्थात् ३.१२ प्रतिशत बढी हो।
कम्पनीको कुल आय ३९ अर्ब १९ करोड ९६ लाख रुपैयाँ पुगेको छ। गत आर्थिक वर्षको सोही अवधिमा कुल आय ३८ अर्ब १८ करोड ८१ लाख रुपैयाँ थियो। यस आधारमा कुल आय १ अर्ब १ करोड १५ लाख रुपैयाँ अर्थात् २.६५ प्रतिशतले बढेको छ।
करअघिको मुनाफा ३४.६६ प्रतिशतले बढ्यो
नेपाल टेलिकमको करअघिको मुनाफामा पनि उल्लेख्य वृद्धि भएको छ। समीक्षा अवधिमा करअघिको मुनाफा १३ अर्ब २६ करोड ४७ लाख रुपैयाँ पुगेको छ।
गत आर्थिक वर्षको सोही अवधिमा करअघिको मुनाफा ९ अर्ब ८५ करोड २ लाख रुपैयाँ थियो। यस वर्ष करअघिको मुनाफा ३ अर्ब ४१ करोड ४५ लाख रुपैयाँ अर्थात् ३४.६६ प्रतिशतले बढेको कम्पनीले जनाएको छ।
कम्पनीको EBITDA पनि बढेर २० अर्ब ४८ करोड १ लाख रुपैयाँ पुगेको छ। गत आर्थिक वर्षको सोही अवधिमा EBITDA १८ अर्ब ४९ करोड ६० लाख रुपैयाँ थियो। यसमा १ अर्ब ९८ करोड ४१ लाख रुपैयाँ अर्थात् १०.७३ प्रतिशतले वृद्धि भएको हो।
कम्पनीको वार्षिकीकृत प्रति सेयर आम्दानी (EPS) ४९ रुपैयाँ २५ पैसा रहेको छ।
ब्याज आम्दानी घटे पनि सञ्चालन आय बढ्यो
कम्पनीका अनुसार ब्याजदर क्रमिक रूपमा घट्दा ब्याज आम्दानीमा कमी आएको छ। गत आर्थिक वर्षको चौथो त्रैमासिकको तुलनामा समीक्षा अवधिमा ब्याज आम्दानी करिब ८६ करोड १९ लाख रुपैयाँ अर्थात् २२.८८ प्रतिशतले घटेको छ।
यद्यपि, GSM सेवातर्फको राजस्व बढ्दा कम्पनीको समग्र सञ्चालन आयमा वृद्धि भएको हो। GSM सेवातर्फको राजस्व गत आर्थिक वर्षको सोही अवधिको तुलनामा ६४ करोड ५४ लाख रुपैयाँ अर्थात् २.२८ प्रतिशतले बढेको कम्पनीले जनाएको छ।
नेपाल टेलिकमले विकट तथा दुर्गम स्थानमा समेत सञ्चार सेवा विस्तार र गुणस्तर सुधारलाई निरन्तरता दिइरहेको जनाएको छ। त्यस्ता क्षेत्रमा लागत बढी र प्रतिफल कम भए पनि नागरिकलाई सञ्चार सेवा उपलब्ध गराउने उद्देश्यले सेवा विस्तारलाई प्राथमिकता दिइरहेको कम्पनीको भनाइ छ।
प्रकाशित मिति: आइतबार, साउन ३१, २०८३
