काठमाडौं । नेकपा एमालेले संविधान दिवसका अवसरमा देशभर विभिन्न कार्यक्रम आयोजना गर्न मातहतका कमिटीलाई निर्देशन दिएको छ।
एमाले महासचिव शंकर पोखरेलले बिहीबार प्रदेश, जिल्ला तथा पालिका कमिटीलाई पत्राचार गर्दै असोज ३ गते पर्ने संविधान दिवसलाई विगतका वर्षझैँ यस वर्ष पनि रचनात्मक, भव्य र उत्साहपूर्ण रूपमा मनाउन निर्देशन दिएका हुन्।
पोखरेलले संविधान संरक्षणको सन्देश प्रवाह हुने गरी आ–आफ्नो क्षेत्र र तहमा प्रभातफेरी, दीपप्रज्वलन, विचार गोष्ठी, सरसफाइ लगायतका कार्यक्रम आयोजना गर्न आग्रह गरेका छन्।
उनले पठाएको पत्रमा भनिएको छ, “आ–आफ्नो क्षेत्र र स्तरमा संविधानको रक्षाको सन्देशसहित प्रभातफेरी, दीपप्रज्वलन, विचार गोष्ठी, सरसफाइ तथा अन्य रचनात्मक कार्यक्रमहरूको आयोजना गरी संविधान दिवसलाई सफल बनाउनुहुन अनुरोध छ।”
एमालेले संविधान दिवसलाई राष्ट्रिय महत्वका साथ मनाउँदै संविधानको संरक्षण र कार्यान्वयनप्रति पार्टीको प्रतिबद्धता जनाउन मातहतका कमिटीलाई आह्वान गरेको हो।
प्रकाशित मिति: बिहीबार, असोज १, २०८३
