काठमाडौं । युरोपेली संघ (ईयू)मा १३ वर्षभन्दा कम उमेरका बालबालिकालाई सामाजिक सञ्जाल प्रयोगमा प्रतिबन्ध लगाउने योजना अघि सारिएको छ ।
युरोपेली आयोगकी अध्यक्ष उर्सुला फोन डेर लेयनले फ्रान्सको स्ट्रासबर्गमा युरोपेली संघका सांसदहरूलाई सम्बोधन गर्दै यस्तो योजना घोषणा गरेकी हुन् ।
उनले ठूला प्रविधि कम्पनीहरूको प्रभाव सीमित गर्न सकिने बताइन् । “धेरै मानिस ठूला टेक कम्पनीहरूको शक्तिलाई अत्यधिक र कहिल्यै परिवर्तन गर्न नसकिने ठान्छन् भन्ने मलाई थाहा छ, तर म यसमा सहमत छैन,” उनले भनिन् ।
प्रस्तावित योजनाअनुसार १३ देखि १५ वर्ष उमेर समूहका बालबालिकाले अभिभावकको निगरानीमा मात्र सामाजिक सञ्जाल प्रयोग गर्न पाउनेछन् । यसका लागि अभिभावकले बनाउने र निगरानी गर्ने ‘मिनी अकाउन्ट’को व्यवस्था गरिने फोन डेर लेयनले बताइन् ।
यस्ता खातामा सीमित सुविधा उपलब्ध हुने र दैनिक एक घण्टासम्म मात्र सामाजिक सञ्जाल प्रयोग गर्न पाउने प्रस्ताव गरिएको छ ।
१५ देखि १८ वर्ष उमेर समूहका बालबालिकाका लागि भने सामाजिक सञ्जाल प्लेटफर्महरूले बालमैत्री तथा सुरक्षित डिजाइन अपनाउनुपर्नेछ ।
फोन डेर लेयनका अनुसार युरोपका युवाहरू अहिले दैनिक चारदेखि छ घण्टासम्म स्क्रिनमा बिताइरहेका छन् । निरन्तर स्क्रोल गर्न प्रेरित गर्ने सामाजिक सञ्जालका फिडले बालबालिकालाई अत्यधिक आकर्षित गरिरहेको उनले बताइन् ।
“यसले बालबालिकाबाट उनीहरूको बाल्यकाल खोसिरहेको छ,” उनले भनिन् ।
प्रकाशित मिति: बिहीबार, असोज १, २०८३
-1789109208-1789365177.jpeg)
