काठमाडौं । बेलायतको आरएएफ फेयरफोर्ड वायुसेना बेसमा तैनाथ दर्जनौँ बी–१ ‘ल्यान्सर’ बमवर्षक विमानलाई अमेरिकाले स्वदेश फिर्ता बोलाएको छ । सम्भावित आतंककारी आक्रमणको जोखिम बढेको भन्दै विमान फिर्ता गरिएको अमेरिकी राष्ट्रपति डोनाल्ड ट्रम्पले बताएका छन् ।
अमेरिकाले फेयरफोर्ड बेसबाट बी–१ बमवर्षक विमानहरू आकस्मिक रूपमा फिर्ता गरेपछि यसको कारणबारे बहस सुरु भएको हो । अमेरिकी विदेशमन्त्री मार्को रुबियोले भने यो नियमित कूटनीतिक तथा सैन्य ‘रोटेसन’ भएको र कुनै प्रत्यक्ष खतरासँग सम्बन्धित नरहेको बताएका थिए ।
तर, केही घण्टापछि राष्ट्रपति ट्रम्पले रुबियोको भनाइ खण्डन गर्दै विमान फिर्ता गर्नुको कारण वास्तविक सुरक्षा खतरा रहेको बताए ।
‘ती विमानहरू अकस्मात् फिर्ता उडेका होइनन्, त्यहाँ वास्तविक खतरा थियो,’ ट्रम्पले पत्रकारहरूसँग भने ।
बेलायती भूमिबाट ड्रोन वा अन्य माध्यममार्फत इरानले आक्रमण गर्ने योजना बनाएको हो कि भन्ने प्रश्नमा ट्रम्पले यस्तो दुस्साहस गरे ठूलो मूल्य चुकाउनुपर्ने चेतावनी दिएका छन् ।
फेयरफोर्ड वरपर केही व्यक्ति पक्राउ
बेलायती सुरक्षा निकायले गत साता फेयरफोर्ड बेस आसपास सम्भावित आक्रमणको योजना बनाएको आशंकामा बेलायती–इरानी दोहोरो नागरिकता भएका केही व्यक्तिलाई पक्राउ गरेको जनाइएको छ ।
इजरायली प्रधानमन्त्री बेन्जामिन नेतान्याहूले उक्त आक्रमण योजनाबारे इजरायलले बेलायतलाई गुप्तचर सूचना उपलब्ध गराएको बताएका छन् ।
फ्लाईदुबई घटनामा पनि इरानमाथि आरोप
फ्लाईदुबईको उडानमा भएको सम्भावित आतंककारी हमलाको प्रयासमा समेत इरानको संलग्नता रहेको ट्रम्पले आरोप लगाएका छन् ।
गत सेप्टेम्बर ३० मा दुबईबाट तेल अभिभतर्फ उडेको फ्लाईदुबई विमानका सहचालक हम्माम अल–हम्मामीले ककपिटमा मुख्य पाइलटमाथि आक्रमण गरेको जनाइएको छ । आक्रमणपछि विमान तीव्र गतिमा तल झरेको र करिब ३० सेकेन्डमै १६ हजार फिट उचाइ गुमाएको बताइएको छ ।
घाइते पाइलट, दुई अवकाशप्राप्त पाइलट तथा केही यात्रुको सहयोगमा आक्रमणकारीलाई नियन्त्रणमा लिएपछि ठूलो दुर्घटना टरेको जनाइएको छ । त्यसपछि विमानलाई साउदी अरेबियाको तबुक विमानस्थलमा आपत्कालीन अवतरण गराइएको थियो ।
ट्रम्पले उक्त घटनामा पनि इरानको प्रत्यक्ष संलग्नता वा उक्साहट रहेको दाबी गरेका छन् ।
यसैबीच, पेन्टागनले बी–१, बी–२ र बी–५२ जस्ता रणनीतिक बमवर्षक विमान अमेरिकाभित्रैबाट परिचालन गरी विश्वका विभिन्न क्षेत्रमा सटीक प्रहार गर्न सकिने अवस्थामा रहेको जनाएको छ ।
प्रकाशित मिति: बुधबार, असोज २१, २०८३
