काठमाडौं । नेकपा (एमाले) पुनर्गठन कार्यदलका संयोजक रामबहादुर थापा ‘बादल’ले अझै कार्यदलको बैठक आह्वान गरेका छैनन् । बिहीबार (असोज १) बैठक बस्ने यसअघि नै निर्णय भए पनि अहिलेसम्म बैठक बोलाइएको छैन ।
दुई छुट्टाछुट्टै प्रतिवेदन एकीकृत गरी भाषा सम्पादन गर्ने जिम्मेवारी पाएका कार्यदल संयोजक बादल, उपाध्यक्ष विष्णु पौडेल र महासचिव शंकर पोखरेल बुधबार छलफलमा जुटेका थिए । छलफलका क्रममा अल्पमतमा परेका बादलले पार्टी अध्यक्ष केपी शर्मा ओलीको साथ खोजेको एक कार्यदल सदस्यले बताएका छन् ।
“अल्पमतमा परेपछि अध्यक्षसँगै बसेर प्रतिवेदन टुंग्याऊँ, गुन्डु जाऊँ भन्ने प्रस्ताव बादलले राख्नुभएछ,” छलफलबारे जानकार एक नेताले भने, “प्रतिवेदन लेख्ने जिम्मा हामीलाई दिएको हो, अध्यक्षकहाँ त प्रतिवेदन लिएर जाने हो, छलफलमा किन जाने भन्ने दुई नेताले राख्नुभएछ ।”
त्यसपछि बादल एक्लै भक्तपुरको गुन्डुस्थित ओली निवास पुगेका थिए । उनले ओलीसँग लामो समय छलफल गरेका थिए ।
यसअघि काभ्रेको बल्थलीमा बसेको तीनदिने आवासीय बैठकमा बादल र पोखरेलले पार्टी पुनर्गठनसम्बन्धी छुट्टाछुट्टै प्रतिवेदन पेस गरेका थिए । दुवै प्रतिवेदनलाई एकीकृत गरी एउटै प्रतिवेदन तयार गर्ने जिम्मेवारी बादल, पौडेल र पोखरेललाई दिइएको थियो ।
प्रतिवेदनमा नेतृत्व छाड्नुपर्ने विषय तथा पुनर्गठनको विषय राख्न नहुने बादलको अडान रहेको बताइएको छ । यही विषयमा तीन नेताबीच सहमति जुट्न सकेको छैन ।
“बादलजी बैठक टार्न खोजिरहनुभएको छ, अहिलेसम्म खबर आएको छैन,” कार्यदलका एक सदस्यले भने ।
प्रकाशित मिति: बिहीबार, असोज १, २०८३
-1789109208-1789365177.jpeg)