काठमाडौं । नेपाली कांग्रेसको संस्थापन इतर समूहले आफ्नै ढंगले १५औँ महाधिवेशनको प्रक्रिया अघि बढाउने निर्णय गरेको छ ।
सोमबार पूर्वसभापति शेरबहादुर देउवा निवास महाराजगञ्जमा बसेको संस्थापन इतर समूहको बैठकले सानेपाको निर्णयका आधारमा संस्थापन पक्षले तय गरेको महाधिवेशन प्रक्रियामा सहभागी हुन सक्ने अवस्था नरहेको निष्कर्ष निकालेको एक नेताले बताए ।
यसअघि संस्थापन पक्षको केन्द्रीय कार्यसम्पादन समितिको बैठकले १४औँ महाधिवेशनबाट निर्वाचित सबै केन्द्रीय सदस्यलाई सोही हैसियतमा १५औँ महाधिवेशनमा सहभागी हुन दिने निर्णय गरेको थियो ।
तर, आफूहरू कुनै पदका लागि नभई पार्टी जोगाउने अभियानमा अघि बढेको भन्दै इतर समूहले उमाकान्त चौधरीले यसअघि प्रस्तुत गरेको १५औँ महाधिवेशनको कार्यतालिकालाई अघि बढाउने निर्णय गरेको ती नेताले बताए ।
बैठकपछि कांग्रेस नेता डा. प्रकाशशरण महतले संस्थापन पक्षको निर्णयबारे अनौपचारिक छलफल भएको जानकारी दिए । उनले सोमबारै अपराह्न ४ बजे पत्रकार सम्मेलन गरी समूहको औपचारिक धारणा सार्वजनिक गर्ने बताए ।
कांग्रेसको केन्द्रीय कार्यसम्पादन समिति बैठकले १५औँ महाधिवेशनमा सहभागी हुन वा आयोजकका रूपमा सामेल हुन चाहने १४औँ महाधिवेशनबाट निर्वाचित केन्द्रीय सदस्यलाई केन्द्रीय सदस्यकै हैसियतमा स्वागत गरी जिम्मेवारी दिने निर्णय गरेको थियो ।
प्रकाशित मिति: सोमबार, भदौ २९, २०८३
