काठमाडौं । चिलिमे जलविद्युत् आयोजनाको सुरुङमा फेला परेका शवहरू बाढीको प्रारम्भिक प्रहारकै कारण प्रभावित भएको देखिएको आयोजनाले जनाएको छ।
आयोजनाका प्रबन्ध निर्देशक बाबुराजा महर्जनका अनुसार हालसम्मको स्थल मूल्यांकनका आधारमा शवको प्रकृति हेर्दा बाढीको प्रारम्भिक प्रहारबाट घटना भएको देखिएको हो। यद्यपि घटनाको वास्तविक तथ्य आधिकारिक मूल्यांकन तथा प्रतिवेदनबाट मात्रै स्पष्ट हुने उनले बताए।
घटनाबारे विभिन्न अनुमान र दोषारोपण भइरहेको भन्दै महर्जनले त्यसो नगर्न आग्रह गरेका छन्। सुरुङमा २१ दिनदेखि जारी उद्धार तथा खोजीका क्रममा बुधबार चार जनाको शव र एउटा मानव अंग फेला परेको थियो।
अत्यन्त कठिन र जोखिमपूर्ण अवस्थामा २१ दिनसम्म उद्धार टोलीले सहकर्मी तथा चिलिमे परिवारका सदस्यलाई बचाउन हरसम्भव प्रयास गरेको महर्जनले बताए।
प्रत्यक्ष जानकारी वा स्थलबाट प्रमाणित तथ्यबिना घटनाबारे अनुमान, अड्कल र दोषारोपण नगर्न उनले आग्रह गरे।
प्रकाशित मिति: बिहीबार, असोज १, २०८३
