२० माघ, काठमाडौँ । चौथो नुवाकोट महोत्सवमा छैटौँ दिनसम्म एकलाख दर्शकले अवलोकन गरेको महोत्सव आयोजक नुवाकोट उद्योग वाणिज्य सङ्घले जनाएको छ । महोत्सवको पहिलो र दोस्रो दिन आधा जिल्ला बन्द रहेपनि दर्शकको उल्लेख्य सहभागिता रहेको थियो भने बन्द खुलेपछि झनै बढेको आयोजकले जनाए । बुधबार महोत्सवको सचिवालयमा भएको पत्रकारसम्मेलनमा महोत्सवको छैटौँ दिनसम्म एक लाख दर्शकले महोत्सव अवलोकन गरिसकेको नुवाकोट उद्योग वाणिज्य सङ्घका अध्यक्ष तथा चौथो नुवाकोट महोत्सवका आयोजक समितिका संयोजक ताराबहादुर कार्कीले बताउनुभयो ।
उहाँका अनुसार बालबालिका र वृद्धलाई निःशुल्क र पहिलो दिन सबैलाई निःशुल्क प्रवेश गर्न दिइएको समेत हिसाब गर्दा एकलाख दर्शक पुगेको छ । “एक लाख दर्शकले अवलोकन गरिसकेका छन् । अझै पनि दिनहरू बाँकी रहेका छन् । महोत्सवमा सहभागी भएर महोत्सव सफल बनाइदिनु होला”, कार्कीले भन्नुभयो, “हाम्रा कमजोरी भएपनि औँल्याइदिनुहोला । महोत्सवमा आकर्षक र उत्कृष्ट कलाकार आउँदैछन् । जिल्लाको सबै क्षेत्रलाई समेट्ने प्रयास गरेका छौँ ।” पत्रकारसम्मेलनमा सङ्घका प्रवक्ता सन्तोष उप्रेतीले सामाजिक सञ्जालमा आइरहेका सल्लाह, सुझाव र प्रतिक्रियालाई समेत ध्यानमा दिएर सुधारसमेत गरेको बताउनुभयो ।
कार्यक्रममा सङ्घका निवर्तमान अध्यक्ष राजन श्रेष्ठले महोत्सवलाई सफल बनाउन जिल्लाका सबै क्षेत्रले ध्यान दिनुपर्ने र सहभागिता जनाउनुपर्ने बताउनुभयो । माघ १४ देखि २४ गतेसम्म आयोजना गरिएको ११ दिने महोत्सवमा सवारीसाधन, लघु तथा घरेलु, हस्तकला, सेवामूलक संस्था, कृषि, पशु, माछा, स्थानीय उत्पादनहरू रुद्राक्ष, केराका परिकार, भूकम्प प्रतिरोधी घर बनाउने प्रविधिको जानकारी दिने लगायतका स्टलहरू महोत्सवमा रहेका छन् ।
प्रकाशित मिति: बुधबार, माघ १९, २०७३
