बुटवल । रुपन्देहीमा गोली चलाएको आरोपमा प्रहरीले तीन जनालाई पक्राउ गरेको छ ।
जिल्ला प्रहरी कार्यालय रुपन्देहीका अनुसार देवदह नगरपालिका–४ का ४२ वर्षीय दीपक खरेल भनिने दुर्गाप्रसाद खरेलले पेस्तोलबाट गोली चलाएका थिए । उनको गोली लागेर बुटवल उपमहानगरपालिका–९ मिलनचोकका २२ वर्षीय रायन खत्री घाइते भएका छन् ।
शनिबार (असोज १७) अपराह्न करिब पौने ४ बजे खरेलले एक राउन्ड गोली चलाएको रुपन्देही प्रहरीका प्रवक्ता एवं डीएसपी कृष्णकुमार चन्दले जानकारी दिए ।
घटनाको अनुसन्धानका क्रममा देवदह–४ मितेरी गाउँका ३८ वर्षीय कमल शर्मा र सोही स्थानका २६ वर्षीय अमृत खरेललाई समेत पक्राउ गरिएको प्रहरीले जनाएको छ ।
गोली लागेर खत्रीको दाहिने गालाको छाला खोस्रिएको छ । उनको देवदह मेडिकल कलेज भलुहीमा उपचार भइरहेको प्रहरीले जनाएको छ ।
घटनाको सूचना पाएपछि खटिएको प्रहरी टोलीले आरोपितहरूलाई शनिबार नै नियन्त्रणमा लिएको हो । प्रहरीले घटनामा प्रयोग भएको पेस्तोल र दुई राउन्ड गोलीसमेत बरामद गरेको जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
प्रकाशित मिति: आइतबार, असोज १८, २०८३
