काठमाडौं । बैंकिङ कसुरसम्बन्धी मुद्दाका फरार आरोपी दिपेन्द्र आले पक्राउ परेका छन् । जिल्ला अदालत काठमाडौंले पक्राउ अनुमति दिएको करिब ९ महिनापछि उनलाई प्रहरीले पक्राउ गरेको हो ।
आइतबार काठमाडौंको मण्डिखाटारमा लुकिछिपी बसेको अवस्थामा आलेलाई पक्राउ गरिएको महानगरीय प्रहरी वृत्त सिंहदरबारका इन्स्पेक्टर देवीराम भण्डारीले जानकारी दिए ।
जिल्ला अदालत काठमाडौंले ३० पुस २०८२ मा आलेलाई पक्राउ गर्न अनुमति दिएको थियो । अदालतबाट पक्राउ पुर्जी जारी भएपछि उनी फरार रहँदै आएका थिए ।
प्रहरीका अनुसार आलेले एक महिलालाई युरोप पठाइदिने भन्दै बैंक खातामार्फत ५ लाख रुपैयाँ लिएका थिए । महिलालाई युरोप पठाउने भन्दै भारतसम्म पुर्याएर अलपत्र पारेको आरोपसमेत उनीमाथि छ ।
पीडित महिलाले सुरुमा आलेविरुद्ध नेपाल प्रहरीको मानव बेचबिखन अनुसन्धान ब्युरोमा उजुरी दिएकी थिइन् । ब्युरोले सोधपुछ गरेपछि आलेले आफूले लिएको रकम बराबरको चेक पीडितलाई दिएका थिए ।
तर, उक्त चेक बाउन्स भएपछि पीडितले आलेविरुद्ध बैंकिङ कसुरमा जाहेरी दिएकी थिइन् । सोही जाहेरीका आधारमा अदालतबाट पक्राउ अनुमति जारी भएको प्रहरीले जनाएको छ ।
इन्स्पेक्टर भण्डारीका अनुसार पक्राउ परेका आलेमाथि थप अनुसन्धान भइरहेको छ ।
प्रकाशित मिति: सोमबार, असोज १९, २०८३
-1791180906-1791183631.jpeg)
