काठमाडौं । नेपाल प्रहरीले इजरायलमा केयरगिभर पठाइदिने भन्दै ठगीमा परेकाहरूलाई जाहेरी दिन आग्रह गरेको छ ।
नेपाल र इजरायल सरकारबीच भएको सम्झौताअनुसार व्यक्तिगत वा अन्य संस्थागत रूपमा कामदार पठाउन नमिल्ने जानकारी गराउँदै प्रहरीले त्यस्तो भन्दै कसैले ठगी गरेको भए जाहेरी दिन आग्रह गरेको हो ।
इजरायल पठाइदिने भन्दै ठगी गरेको आरोपमा भरत चौलागाईंसहितको समूह हाल थुनामा रहेकाले उनीहरूबाट ठगीमा परेकाहरूलाई जाहेरी दिन केन्द्रीय अनुसन्धान ब्युरो (सीआईबी)ले आग्रह गरेको छ ।
प्रहरीका अनुसार उक्त समूहले प्रधानमन्त्री तथा मन्त्रिपरिषद्को कार्यालयको फर्जी कागजातसमेत देखाएर दुई करोड ५० लाख रुपैयाँभन्दा बढी रकम ठगी गरेको थियो ।
ठगीमा परेका अन्य व्यक्तिसमेत भए उनीहरूले आवश्यक प्रमाणसहित प्रहरीमा जाहेरी दिन सीआईबीले आग्रह गरेको छ ।
प्रकाशित मिति: बुधबार, असोज २१, २०८३
