काठमाडौं । सुनजस्तो देखिने नक्कली धातु देखाएर ठगी गरेको आरोपमा प्रहरीले एक युवकलाई पक्राउ गरेको छ।
पक्राउ पर्नेमा ओखलढुंगाको सिद्धिचरण नगरपालिका–१ का २८ वर्षीय अनिष थापामगर रहेका छन्।
जिल्ला प्रहरी परिसर काठमाडौंका एसपी दानबहादुर थापाका अनुसार उनलाई बिहीबार (भदौ २५) बेलुका सुनजस्तो देखिने धातुसहित टोखा नगरपालिका–९, मिलन टोलस्थित एक गेस्टहाउसबाट पक्राउ गरिएको हो।
प्रहरीका अनुसार थापामगरले उक्त धातुलाई सक्कली सुन भन्दै सस्तो मूल्यमा सुन मिलाइदिने प्रलोभन देखाएर विभिन्न व्यक्तिबाट १ करोड ३९ लाख रुपैयाँ ठगी गरेको अनुसन्धानबाट खुलेको छ।
पक्राउपछि उनको अपराध रेकर्ड जाँच गर्दा बलात्कार मुद्दामा थुनामा रहेका थापामगर २०८२ भदौ २४ गते जेनजी प्रदर्शनका क्रममा ललितपुरस्थित नक्खु कारागारबाट फरार भएको समेत खुलेको प्रहरीले जनाएको छ।
प्रकाशित मिति: आइतबार, भदौ २८, २०८३
