काठमाडौं । नेपालका बाढी प्रभावित समुदायका लागि युरोपेली युनियन (ईयू)ले थप आठ करोड ९० लाख रुपैयाँबराबरको मानवीय सहायता तथा राहत सामग्री उपलब्ध गराउने भएको छ ।
यो थप सहयोगसँगै बाढीजन्य विपद्मा ईयूको कुल आपत्कालीन आर्थिक सहायता ४४ करोड ५० लाख रुपैयाँ पुग्नेछ ।
नयाँ बजेट नेपाल रेडक्रस सोसाइटीको नेतृत्वमा सञ्चालन भइरहेको इन्टरनेसनल फेडेरेसन अफ रेडक्रस एन्ड रेड क्रिसेन्ट सोसाइटिज (आईएफआरसी)को विपद् प्रतिकार्य आपत्कालीन कोष (आरईएफ)मार्फत सञ्चालन हुने राहत अभियानमा प्रयोग गरिने जनाइएको छ ।
नेपालस्थित ईयूको प्रतिनिधिमण्डलका अनुसार उक्त अभियानले वाग्मती प्रदेशका करिब चार हजार घरपरिवारका २० हजारसम्म मानिसलाई आपत्कालीन तथा अस्थायी आवास, नगद सहायता, खानेपानी तथा सरसफाइ, स्वास्थ्य सेवा, मानसिक स्वास्थ्य तथा मनोसामाजिक परामर्श, संरक्षणलगायत अत्यावश्यक सहयोग उपलब्ध गराउने लक्ष्य राखेको छ ।
भदौ १० गते आएको विनाशकारी बाढीबाट ठूलो जनधनको क्षति हुनुका साथै घर, पूर्वाधार र अत्यावश्यक सेवामा व्यापक क्षति पुगेपछि ईयूले थप सहायता घोषणा गरेको हो ।
यसैगरी, कोपेनहेगेनस्थित ईयूको आपत्कालीन मौज्दातबाट ८० टनभन्दा बढी राहत सामग्री बोकेको उडान यसै साताको उत्तरार्धमा नेपाल आइपुग्ने तालिका रहेको ईयूको विज्ञप्तिमा उल्लेख छ ।
प्रकाशित मिति: बिहीबार, भदौ १८, २०८३
-1788432025.jpg)