काठमाडौं । नागरिक लगानी कोषले प्रधानमन्त्री दैवी प्रकोप उद्धार कोषमा १ करोड १ लाख रुपैयाँ आर्थिक सहयोग गरेको छ।
कोषका सञ्चालक समितिका कार्यवाहक अध्यक्ष उत्तरकुमार खत्री र कार्यकारी निर्देशक पर्वतकुमार कार्कीले सोमबार उक्त रकमको चेक अर्थमन्त्री डा. स्वर्णिम वाग्लेलाई हस्तान्तरण गरेका हुन्। नागरिक लगानी कोषको आधिकारिक वेबसाइटले पनि उक्त सहयोगबारे जानकारी सार्वजनिक गरेको छ।
रसुवाको भोटेकोशी तथा त्रिशूली नदीमा आएको विनाशकारी बाढीबाट ठूलो मानवीय तथा भौतिक क्षति भएपछि सरकारले सञ्चालन गरिरहेको राहत, उद्धार तथा पुनःस्थापनाका कार्यमा सहयोग पुर्याउने उद्देश्यले कोषले उक्त रकम प्रदान गरेको हो।
चेक हस्तान्तरण कार्यक्रममा नागरिक लगानी कोषका सञ्चालक समितिका सदस्य नारायणप्रसाद घिमिरे तथा निर्देशक शोभा श्रेष्ठको समेत उपस्थिति थियो।
बाढी प्रभावित क्षेत्रमा राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा पछिल्लो समय विभिन्न संघसंस्था तथा निजी क्षेत्रबाट उल्लेख्य सहयोग जुटिरहेको छ।
प्रकाशित मिति: बुधबार, भदौ १७, २०८३
