काठमाडौं । विगत २४ घण्टायता नेपालमा थप ३ सय १६ जनामा कोरोना भाइरसको संक्रमण पुष्टि भएकाे छ ।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार पछिल्लो २४ घण्टामा ७१ जना महिला र २ सय ४५ जना पुरुषमा काेराेना संक्रमित थपिएका हुन् ।
जसमध्ये काठमाडौं उपत्यकामा मात्रै १४ जनामा कोरोना भाइरसको संक्रमण देखिएकाे छ ।
मंगलबार राष्ट्रिय जनस्वास्थ्य प्रयोगशाला, त्रिवि शिक्षण अस्पताल महाराजगञ्ज र पाटन अस्पतालको प्रयोगशालामा गरिएको परीक्षणमा काठमाडौं उपत्यकामा थप १४ जनामा कोरोना भाइरसको संक्रमण पुष्टि भएको डा. गौतमले जानकारी दिए।
उपत्यकाका संक्रमितहरुमा काठमाडौंका ७ पुरुष र ५ महिला गरी १२ जना, ललितपुर र भक्तपुरका १-१ जना रहेको उनले बताए ।
यससँगै नेपालमा काेराेना संक्रमितको संख्या १३ हजार ५ सय ६४ जना पुगेको छ ।
यसैगरी हालसम्म ३ हजार १ सय ९४ जना संक्रमणमुक्त भएको गौतमले जानकारी दिए । जसमा २ सय ७७ महिला २ हजार ९ सय १७ जना पुरुष छन् ।
हालसम्म प्रदेश १ मा ५९५, प्रदेश २ मा ३ हजार ७ सय ९४, बागमती प्रदेशमा ४ सय २८, गण्डकी प्रदेशमा १ हजार १७, प्रदेश ५ मा ३ हजार ८ सय ७, कर्णाली प्रदेशमा १ हजार ४ सय ६६ र सुदूरपश्चिम प्रदेशमा २ हजार ४ सय ५७ जनामा काेराेना संक्रमण पुष्टि भएकाे स्वास्थ्य मन्त्रालयले जनाएकाे छ ।
प्रकाशित मिति: मंगलबार, असार १६, २०७७
-1732776560.jpg)
