पोखरा । गण्डकी प्रदेशमा बिहीबार मात्रै ७७ जनामा कोरोना भाइरस संक्रमण पुष्टि भएको छ । स्याङजा, पर्वत, तनहुँ, बागलुङ र नवलपरासीमा बिहीबार नयाँ संक्रमित पुष्टि भएको गण्डकी स्वास्थ्य निर्देशनालयले जनाएको छ ।
गण्डकी स्वास्थ्य निर्देशनालयको पछिल्लो सूचनाअनुसार स्याङजामा ९ जनामा कोरोना संक्रमित पुष्टि भएको छ । संक्रमित पुष्टि हुनेमा आँधिखोला गाउँपालिकामा ७२ र ३४ वर्षीया २ जना महिला तथा १३ र १९ वर्षका २ पुरुष छन् ।
यसैगरी कालिगण्डकी गाउँपालिकाका १८, २१, २६, ३० र ३३ वर्षीय ५ जना पुरुषमा कोरोना पुष्टि भएको छ ।
त्यस्तै पर्वतमा ४ जनामा कोरोना भाइरस पुष्टि भएको छ । कुश्मा नगरपालिका २० वर्षीय पुरुष, फलेबास नगरपालिकाका १९ र २२ वर्षीय २ पुरुष, जलजला गाउँपालिकाका १६ वर्षीय पुरुष छन् ।
बागलुङ गल्कोट नगरपालिकाका ३३ वर्षीय एक पुरुषमा पनि कोरोना भाइरस देखिएको छ ।
तनहुँको ब्यास नगरपालिकाका ३ जनामा पनि कोरोना भाइरस संक्रमण पुष्टि भएको निर्देशनालयले जनाएको छ । उनीहरु २९, २५ र ४५ वर्षीय पुरुष हुन् ।
पूर्वी नवलपरासी समेत १३ जनामा कोरोना भाइरस पुष्टि भएको छ । हुप्सेकोट गाउँपालिका र विनयत्रिवेणी गाउँपालिकाका उनीहरु १९ देखि ३९ वर्ष समूहका छन् ।
यसअघि बिहीबार बिहान नै ४७ जनामा संक्रमण पुष्टि भएकाे विवरण सार्वजनिक भएकाे थियाे ।
प्रकाशित मिति: बिहीबार, असार ४, २०७७
-1732776560.jpg)
