काठमाडौं । कन्दरा ब्यान्डले कन्सर्टमार्फत संकलन भएको २१ लाख रुपैयाँ भोटेकोसी बाढीपीडितका लागि प्रधानमन्त्री दैवी प्रकोप उद्धार कोषमा हस्तान्तरण गरेको छ ।
कन्दराको आह्वान र अग्रसरतामा बीएनएमको आयोजनामा अमेरिकाको एटलान्टामा कार्यक्रम भएको थियो । कार्यक्रममा नेपाली दर्शक, विभिन्न संघसंस्था, व्यवसायी, कलाकार, शुभेच्छुक तथा समुदायको सहभागिताबाट उक्त रकम संकलन गरिएको हो ।
एटलान्टास्थित गैरनाफामूलक संस्था नेपलिज एसोसिएसन अफ जर्जियाको बैंक खातामार्फत रकम प्रधानमन्त्री राहत कोषमा हस्तान्तरण गरिएको कन्दराले सामाजिक सञ्जालमार्फत जनाएको छ ।
कन्दराका गायक तथा संस्थापक विवेक श्रेष्ठले यो कार्यक्रम केवल सांगीतिक कार्यक्रम नभई हजारौँ माइल टाढा रहेका नेपालीहरूको मातृभूमिप्रतिको सामूहिक भावनाको अभिव्यक्ति भएको बताए ।
देश दुःखमा रहेका बेला गीत गाउन सहज नभए पनि संगीतलाई पीडामा मल्हम लगाउने माध्यम बनाउन सकिन्छ भन्ने विश्वासका साथ कार्यक्रम आयोजना गरिएको कन्दराले जनाएको छ ।
कन्दरा अगस्ट ७ देखि सेप्टेम्बर ३० सम्म दुई महिना लामो अमेरिका टुरमा रहेको छ । टुरको सुरुआत बोस्टनबाट गरिएको हो।
प्रकाशित मिति: मंगलबार, भदौ १६, २०८३
