काठमाडाैं । अस्पतालमा भर्ना भएकी १ बालिकामा कोरोना संक्रमण देखिएपछि त्रिवि शिक्षण अस्पताल, महाराजगन्जका ३८ जना स्वास्थ्यकर्मीलाई क्वारेन्टाइनमा राखिएको छ ।
अस्पतालका कार्यकारी निर्देशक डा प्रेमराज खड्गाले प्रेस विज्ञप्ति जारी गर्दै बालिकाको प्राइमरी सम्पर्कमा आएका व्यक्तिको पिसिआर परीक्षण गर्ने र १४ दिन क्वारेन्टाइन र सेल्फ क्वारेन्टाइनमा राख्ने जानकारी दिएका हुन् ।
बिहीबार नै अस्पतालका स्वास्थ्यकर्मी र कर्मचारीको पिसिआर परीक्षणका लागि स्वाब संकलन गरिएको छ । ती बालिकाको प्राइमरी सम्पर्कमा पुगेका व्यक्तिमा पनि कोरोना संक्रमण पाइए सेकेन्डरी सम्पर्कमा आएका व्यक्तिहरूको कन्ट्याक ट्रेसिङ गरी उनीहरूकाे पनि काेराेना परीक्षण गर्ने अस्पतालले जनाएको छ ।
यसैगरी अस्पताल प्रशासनले हाललाई अत्यावश्यकबाहेकका सर्जरी नगर्न पनि आफ्ना चिकित्सकहरूलाई आग्रह गरेको छ । चिकित्सकहरूलाई इलेक्टिभ सर्जरी नगर्न र इमर्जेन्सी सर्जरी गर्दा पनि अनिवार्य रूपमा पिपिई प्रयोग गर्न भनेको हो ।
प्रकाशित मिति: बिहीबार, जेठ १, २०७७
-1732776560.jpg)
