काठमाडाैं । बागलुङकी कोरोना संक्रमित १९ वर्षीया युवती अंशु सापकाेटाकाे कोरोना परीक्षणको छैठौँ रिपोर्ट पनि नेगेटिभ आएपछि अस्पतालबाट डिस्चार्ज भएकी छिन् ।
बागलुङ नगरपालिका ४ कुँडुलेकी १९ वर्षीया अशु सापकोटाको रिपोर्ट नेगेटिभ आएको स्वास्थ्य कार्यालय बागलुङका प्रमुख सुरज गुरौँले दिए ।
लगातार पाँचौ र छैठौँ रिपोर्ट नेगेटिभ आएपछि सापकोटालाई डिस्चार्ज गरिएको अस्पतालका प्रमुख चिकित्सक शैलेन्द्र विक पोखरलले जानकारी दिए ।
अस्पतालबाट घर फर्कने क्रममा सापकोटाले आफ्नो आत्मबल र चिकित्सक, स्वास्थ्यकर्मीको स्याहारले कोरोनालाई जित्न सफल भएको बताइन् ।
म खुसी छु, मलाई सहयोग गर्ने सबैलाई धन्यवाद दिन चाहन्छु , उनले भनिन्, अस्पतालमा बस्दा राम्रो हेरचाह पाएँ, परिवार र आफन्तले माया दिए । सापकोटाका बुबा ऋषिरामले छोरीमा संक्रमण भएको थाहा पाउँदा पीडा भए पनि निको भएर फर्कदाँ सिंगाे परिवारमा खुसी छाएको बताए ।
उनी चैत ४ गते बेल्जियमबाट कतार एयरवेजको बिमान हुँदै नेपाल फर्किएकी थिइन् । त्यही क्रममा उनमा चैत १५ गते कोरोना संक्रमण पुष्टि भएको थियो ।
यसैगरी चितवनको राप्ती नगरपालिका- ८ का २७ वर्यीय कोरोना संक्रमित पनि कोरोना भाइरस मुक्त भएका छन् । कोरोना परीक्षणको दोस्रो रिपोर्ट पनि नेगेटिभ आएपछि उनलाई डिस्चार्ज गर्ने तयारी गरिएको छ ।
भरतपुर अस्पतालको क्याबिनमा राखेर उपचार गराइरहेका उनको शुक्रबार गरिएको दोस्रो पीसीआर परीक्षण रिपोर्ट नेगेटिभ आएकाले शनिबार डिस्चार्ज गरिने अस्पतालका सूचना अधिकारी लिलाधर पौडेलले जानकारी दिए ।
उनका अनुसार कोरोना संक्रमण भएपछि भरतपुर अस्पतालको आइसोलेसनमा उनीसहित उनैका ६३ वर्षीया आमा आइसोलेसनमा छन्।
गत चैत ३ गते बेलायतबाट फर्केका पूर्वी चितवन राप्ती नगरपालिका-८ ब्रह्मनगरका ती आमा-छोरामा गत शुक्रबार कोरोना भाइरसको संक्रमण पुष्टि भएको थियो। तीमध्ये छोरा निको भएका हुन्।
प्रकाशित मिति: शनिबार, वैशाख १३, २०७७
-1732776560.jpg)
