दमक । झापाको दमकमा शुक्रबार साँझ १ जना पुरुषमा कोरोना भाइरसको संक्रमण पुष्टि भएपछि यहाँ उच्च सतर्कता अपनाइएकाे छ ।
गत चैत ४ गते दुबईबाट घर आएका २८ वर्षे छोरासहित एकै परिवारका ३ जनामा बिहीबार गरिएको आरडिटी परीक्षणमा तीनै जनाको एन्टिबडी पोजेटिभ देखिएको र तीमध्ये ६२ वर्षीय पुरुषमा भने पिसिआर परीक्षणका क्रममा कोरोना भाइरसको संक्रमण पुष्टि भएपछि सुरक्षा सतर्कता थालिएको हो ।
संक्रमण पुष्टि भएलगत्तै नगरपालिकामा शुक्रबार साँझ नै बसेको बैठकले कोभिड–१९को संक्रमण देखिएको वडा आसपासका क्षेत्रमा थप कडाइ गर्ने निर्णय भएको नगरपालिकाका प्रवक्ता तथा उपप्रमुख गीता अधिकारीले बताइन् ।
उनका अनुसार संक्रमितको घर बिहीबार बेलुकादेखि नै सिल गर्नुका साथै त्यस घर नजिकैको भुटानी शरणार्थी शिविरसमेत सिल गरिएको छ ।
बिहीबार दमक–३ का एकै परिवारका ३ जनामा गरिएको र्यापिड टेस्टमा एन्टिबडी पोजेटिभ देखिएपछि सुनसरीको धरानस्थित बिपी कोइराला स्वास्थ्य विज्ञान प्रतिष्ठानमा गरिएको पिसिआर परीक्षणका क्रममा १ जनामा कोरोना संक्रमण देखिएको थियो ।
दमक अस्पतालको आइसोलेसनमा ती संक्रमितसहित ७ जना राखिएको र उनीहरुको अवस्था सामान्य रहेको बताइएकाे छ ।
शुक्रबारसम्ममा दमकका विभिन्न ३ क्वारेन्टाइनमा ४१ जना छन् । दमक–४ स्थित मानसरोवरमा २१, दाहाल प्रतिष्ठानमा ६ र जामे मस्जिदको क्वारेन्टाइनमा १४ जना छन् । उनीहरु सबैको स्वास्थ्य अवस्था सामान्य छ ।
प्रकाशित मिति: शनिबार, वैशाख १३, २०७७
-1732776560.jpg)
