काठमाडौँ । काठमाडौँको कागेश्वरी मनोहरा नगरपालिका ९, पेप्सीकोलास्थित सनसिटी अपार्टमेन्टमा बस्ने २ सय ९६ जनाको कोरोना परीक्षणको रिपोर्ट नेगेटिभ आएपछि त्यहाँको वातावरण उल्लासमय बनेको छ।
अपार्टमेन्टको ‘ए ब्लक’ मा बसोबास गर्ने सबै र केही अरु ब्लकमा बस्नेहरुको परीक्षण गरिएकामा सबैको रिपोर्ट नेगेटिभ आएपछि यहाँ बसोबास गर्ने परिवार हर्षित बनेका छन्।
३ दिनसम्म आफूलाई पनि संक्रमण भएको हुनसक्ने भनी त्रसित भएकामा त्यो हटेकाले सबै खुसी हुनु स्वभाविक भएको सनसिटी वेयलफेयर सोसाइटीका अध्यक्ष तिलक बस्नेतले बताए।
अपार्टमेन्टका २ जनामा कोभिड–१९ को संक्रमण पुष्टि भएपछि त्यहाँ र्यापिड टेस्ट (आरडिटी) सुरु गरिएको थियो ।
बस्नेतका अनुसार सोसाइटीले अहिले पनि भीडभाड नगर्न भनिरहेको छ । अहिलेसम्म तालाबन्दी (सिल) को अवस्था रहेकाले सबै जना आ–आफ्नो फ्ल्याटमा बसिरहेका छन् ।
कोभिड–१९ को संक्रमण सुरु भएदेखि नै आवश्यक सावधानी अपनाइएको भन्दै बस्नेतले भने, ‘त्यसैले पनि यहाँ संक्रमण नफैलिएको हो ।’
स्वास्थ्य सेवा विभागले कागेश्वरी मनोहरा नगरपालिकासँगको सहकार्यमा ‘ए ब्लक’ मा बसोबास गर्ने सबै र अरु ब्लकका पनि दीर्घरोगीको परीक्षण गरेको थियो ।
परीक्षण गरिएका सबैको रिपोर्ट नेगेटिभ आएको स्वास्थ्य तथा जनसङ्ख्या मन्त्रालयले जनाएको छ। तीमध्ये संक्रमित व्यक्तिको घरमा काम गर्दै आएका २ जनाको भने पिसिआर प्रविधिबाट समेत परीक्षणका लागि स्वाब पठाइएको छ।
नगर अस्पतालले सोमबार गरेको आरडिटी परीक्षणका क्रममा अपार्टमेन्टमा बस्दै आएका ३ जनाको रिपोर्ट नेगेटिभ आएसँगै यहाँ प्रशासनले सिलबन्दी गरेको थियो ।
ती तीनै जना व्यक्ति अहिले पाटन अस्पतालको आइसोलेसनमा छन् । ३ जनामध्ये १ महिलाको पिसिआर परीक्षणको रिपोर्ट नेगेटिभ आए पनि उनी अस्पतालमै छिन् ।
अपार्टमेन्टभित्रका दीर्घरोगी को को छन् भनी पहिचान गर्न त्यहाँको व्यवस्थापन समितिले सहयोग गरिरहेको छ । नगर प्रमुख कृष्णहरि थापाले कतिपय दीर्घरोगी उपचारका लागि अस्पताल जानुपर्ने भए पनि परीक्षण गरेर ‘नेगेटिभ’ नआएसम्म जान नसक्ने हुँदा उनीहरूलाई प्राथमिकता दिइएको बताए ।
अपार्टमेन्टमा बसोबास गर्ने सबै र अपार्टमेन्ट बाहिरकाले समेत आफूहरूको परीक्षण गर्नुपर्ने माग गरेका छन्। नजिकमा रहेका पसल र घरले समेत आफू संक्रमितको सम्पर्कमा आएको हुनसक्ने भन्दै परीक्षण गर्नुपर्ने माग गरेको छन्।
अपार्टमेन्टभित्र बसोबास गर्नेको परीक्षण सकिएपछि त्यस बाहिरका बैंक, पसल, एटीएमलगायत स्थानका व्यक्तिको पनि परीक्षण हुन माग भएको छ।
स्वास्थ्य मन्त्रालय मातहतको इपिडिमियोलोजी तथा रोग नियन्त्रण महाशाखाका प्रमुख डा.वासुदेव पाण्डेले भने हाल अपार्टमेन्ट आसपासमा दू्रत परीक्षणको योजना नरहेको बताए।
अन्य व्यक्तिमा पोजेटिभ नपाइएपछि नजिकका कार्यालय र पसका व्यक्ति त्रसित हुनु नपर्ने उनको भनाइ छ।
प्रकाशित मिति: बिहीबार, वैशाख ४, २०७७
-1732776560.jpg)
