काठमाडौँ । स्वास्थ्य तथा जनसंख्यामन्त्री भानुभक्त ढकालले चिकित्सक र स्वास्थ्यकर्मीका लागि आवश्यक सामग्रीको अभाव हुन नदिने प्रतिबद्धता दोहोर्याएका छन् ।
बुधबार मन्त्रालयमा सुदूरपश्चिम प्रदेशबाट प्रतिनिधिसभामा प्रतिनिधित्व गर्ने ३ जना सांसदको संयुक्त मागपत्र बुझ्दै मन्त्री ढकालले कोरोना भाइरस (कोभिड १९)को उपचारका लागि चिकित्सक र स्वास्थ्यकर्मीले स्वास्थ्य सामग्रीको अभाव झेल्नु नपर्ने बताए ।
आवश्यक स्वास्थ्य सामग्रीहरू अस्पतालमा पुगेको भन्दै कतिपय सामग्रीहरू निरन्तर पुर्याइने उनले बताए । सुदूरपश्चिम प्रदेशको संवेदनशीलतालाई सरकारले बुझेको भन्दै उनले कोभिड १९ को नमुना परीक्षणको काम दोब्बर बनाउनका लागि बुधबार मात्रै हेलिकोप्टरमार्फत पिसिआर मेसिन धनगढी पठाइएको जानकारी दिए ।
सुदूरपश्चिम प्रदेशमा कोरोना रोकथाममा भइरहेको काम थप प्रभावकारी बनाउने विषयमा आफ्नो भनाइ राख्दै बझाङका प्रतिनिधिसभा सदस्य भैरवबहादुर सिंह, बैतडीका प्रतिनिधिसभा सदस्य दामोदर भण्डारी र दार्चुलाका प्रतिनिधिसभा सदस्य गणेशसिंह ठगुन्नाले नागरिकहरू अहिले पनि सीमावारपार गरिरहेको भन्दै चिन्ता प्रकट गरे ।
प्रकाशित मिति: बिहीबार, चैत २७, २०७६
-1732776560.jpg)
