काठमाडौं । सरकारले बुटवलस्थित कोरोना अस्पतालमा मृत्यु भएका पुरुषमा कोरोनाको संक्रमण नभएको जानकारी दिएकाे छ ।
सोमबार स्वास्थ्य मन्त्रालयमा आयोजित नियमित पत्रकार सम्मेलनमा प्रवक्ता डा. विकास देवकोटाले दुबईबाट आएका ३४ वर्षीय पुरुषको मृत्यु कोरोना भाइरसका कारण नभएको पुष्टि भएको बताएका हुन् ।
यसैगरी साेमबार पाटन अस्पतालमा मृत्यु भएका ३६ वर्षीय पुरुष तथा काठमाडौंको वीर अस्पतालमा मृत्यु भएका २ जनाकाे कोरोना परीक्षणको जारी रहेकाे पनि प्रवक्ता देवकाेटाले जनाए ।
यसैगरी साेमबार ७६ जनाको नमुना परीक्षण गरिएकाे र सबै जनाकाे रिपाेर्ट नेगेटिभ आएकाे बताइएकाे छ । नेपालमा साेमबारसम्म ९ सय ९३ जनाकाे परीक्षण गरिएकामा ९ सय ८८ जनाकाे नतिजा नेगेटिभ आएकाे छ भने ५ जनामा काेराेना संक्रमण पाेजेटिभ देखिएकाे छ ।
५ जना संक्रमितमध्ये १ जना निको भएर घर फर्किसकेका छन् भने ४ जना आइसाेलेसनमा उपचाररत छन् ।
यसैगरी प्रवक्ता देवकाेटाले अहिलेसम्म कोरोना संक्रमण देखिएका ४ वटै पोजेटिभ केसको कन्ट्रयाक्ट ट्रेसिङ गरिएको र उनीहरुका नजिकका परिवारका सदस्य र आफन्तहरुको हालसम्म गरिएको परीक्षण नेगोटिभ आएको पनि जानकारी दिए ।
प्रकाशित मिति: सोमबार, चैत १७, २०७६
-1732776560.jpg)
