सिन्धुपाल्चोक । सिन्धुपाल्चोकको जुगल गाउँपालिकास्थित गुम्बा गाउँमा फैलिएको रुघाखोकी, ज्वरोका बिरामीको संख्या २ सय नाघेको छ ।
गाउँपालिकाकाे वडा नम्बर ३ स्थित गुम्बा गाउँमा रुघाखोकी, ज्वरोले ग्रस्त हुनेको संख्या २ सय १ पुगेको जुगल गाउँपालिकाका अध्यक्ष होमनारायण श्रेष्ठले जनाए ।
‘बुधबार बिहानसम्म बिरामी दर्ता संख्या २ सय १ पुगेको छ,’ अध्यक्ष श्रेष्ठले भने, ‘तीमध्ये २०/२५ जना उपचारपछि निको भएको पनि जानकारी आएको छ ।’
सुरुमा कोरोना भाइरससँग लक्षण मिल्ने देखिएपनि औषधि चलाएपछि लक्षण कम हुँदै गएको बताइएकाे छ ।
कोरोना भाइरसको संक्रमण हुँदा देखापर्ने लक्षणसँग मिल्दोजुल्दो लक्षण देखिएको भन्दै गाउँपालिकाले २८ माघमा विशेषज्ञको टोली पठाएर सहयोग गर्न स्वास्थ्य मन्त्रालयलाई आग्रह गरेको छ।
प्रभावित क्षेत्रमा उपचारका लागि गाउँपालिकामा उपलब्ध स्वास्थ्य टोली शुक्रबारदेखि नै खटिरहेको छ। अहिले बिहान छिमेकी जलबिरे गाउँपालिकाको स्वास्थ्य केन्द्रबाट २ चिकित्सकसहितको टोली प्रभावित स्थलमा गएकाे छ ।
बिरामीहरुको उपचार र बन्दोबस्तीको लागि गाउँपालिकाले सतर्कताका साथ टिमलाई अलर्टमा राखेको गाउँपालिका उपाध्यक्ष सिर्जना तामाङले जानकारी दिइन् ।
यस्तै गुम्बामा कोरोना संक्रमणको त्रास फैलिएपछि सिन्धुपाल्चोक जिल्ला प्रहरी कार्यालयले पनि सक्रियता देखाएको छ । कात्तिके प्रहरी चौकीबाट असई सुरेन्द्र साहको नेतृत्वमा प्रहरी टोली घटनास्थल जाँदै गरेको जिल्ला प्रहरी कार्यालयका प्रवक्ता प्रहरी निरीक्षक रामचन्द्र घिमिरेले जानकारी दिए।
प्रकाशित मिति: बुधबार, माघ २९, २०७६
-1732776560.jpg)
