हुम्ला । मौसमी रुघाखोकीका कारण हुम्लाको खार्पुनाथ गाउँपालिका–३ रायागाउँ निवासी एक महिलाको मृत्यु भएको छ ।
केही दिनयता फैलिएको मौसमी रुघाखोकीले गाउँ नै थला परेको छ । सोमबार राति रुघाखोकीले रायागाउँकी ३६ वर्षीया चुन्दा बुढाको मृत्यु भएको स्थानीय पूर्णबहादुर रोकायाले जानकारी दिए । उनले मृतकका श्रीमान् घरमा नभएको बताए । मृतक बुढाका १ छोरी, २ छोरा गरी ३ बच्चा छन् ।
रुघाखोकीले गाउँ नै थला परेपछि गाउँमै रहेको राया स्वास्थ्यचौकीमा दैनिक १५ देखि २० जना उपचारका लागि आउने गरेको अहेव वीरसिंह रावलले जानकारी दिए । रावल आफैँ १ हप्तादेखि गाउँमा फैलिएको मौसमी रुघाखोकीले बिरामी भएर स्वास्थ्यचौकीमा जान सकेका छैनन् ।
राया स्वास्थ्यचौकीमा यतिबेला ज्वरो आउने, टाउको दुख्ने, घाँटी पोल्ने, हातखुट्टा झमझमाउनेजस्ता रोगका बिरामी उपचार गराउन आउने गरेको उनले बताए । उनका अनुसार अहिले स्वास्थ्यचौकीमा मौज्दात रहेको औषधि पनि सकिन लागेको छ ।
हिउँदको महिना सुरु भएसँगै जिल्लाका सातै गाउँपालिकामा रहेका स्वास्थ्यचौकीमा बिरामीको सङ्ख्या बढेकाे छ । गत मंसिर महिनाको अन्तिम साता परेको भारी हिमपातले बिरामीको सङ्ख्या अझ बढ्दै गएको छ ।
जिल्ला अस्पताल हुम्लामा पनि बिरामीको चाप बढ्दै गएको छ । रुघाखोकीका बिरामीले अस्पतालका शय्या भरिभराउ हुने गरेको छ ।
प्रकाशित मिति: बुधबार, पुस १६, २०७६
-1732776560.jpg)
