काठमाडौं । प्रधानमन्त्री केपी ओलीको थप स्वास्थ्य उपचारका लागि त्रिवि शिक्षण अस्ताल सार्ने तयारी गरिएकाे छ । हाल उपचाररत मनमोहनमा डाइलासिस मेसिन नभएकाले प्रधानमन्त्रीलाई शिक्षण अस्पतालमा सार्ने तयारी थालिएको हो ।
प्रधानमन्त्रीको उपचारका लागि अल्पकालीन र दीर्घकालीन तयारीबारे छलफल गर्न चिकित्सक तथा विशेषज्ञहरुको बैठक बसेको जानकारी उपचार टिमका संयोजक प्रा.डा.अरुण सायमीले दिए ।
एपेन्डिसाइटिसकाे शल्यक्रियापछि अस्पतालमै आराम गरिरहेका प्रधानमन्त्री ओलीको मिर्गौलाको कार्यक्षमतामा ह्रास आएपछि बुधबार पुनः डायालासिस गरिएको थियो । रगत शुद्धीकरणका लागि डायलासिस गर्नुपरेको चिकित्सकले जनाएका छन् ।
यो उनको पाँचौ पटकको नियमित डायलासिस हो। महाराजगन्जस्थित सरकारी अस्पताल मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा बुधबार साँझ डायलासिस गरिएको हो । यसअघि प्रधानमन्त्री ओलीको धापासिस्थित ग्राण्डि इन्टरनेशनल हस्पिटलमा चार पटकसम्म डायलासिस गरिएको थियो ।
प्रधानमन्त्रीको स्वास्थ्यमा उल्लेखनीय सुधार आउ पनि उनलाई सघन उपचारको सम्पूर्ण व्यवस्थासहित निरन्तर निगरानीमा राखिएको अस्पतालका कार्यकारी निर्देशक प्राडा. उत्तमकृष्ण श्रेष्ठद्वारा हस्ताक्षरित विज्ञप्तिमा जनाइएको छ ।
शुभेच्छुकलाई प्रधानमन्त्रीकाे धन्यवाद
यसैबीच शल्यक्रियापछि अस्पतालमै उपचाररत प्रधानमन्त्री ओलीले आफ्नाे स्वास्थ्यलाभकाे कामना गर्ने शुभेच्छुकलाई धन्यवाद दिएका छन् । सामाजिक सञ्जाल ट्विटरमार्फत ओलीले धन्यवाद दिएका हुन् ।
बितेका दुई दिनयता म एपेन्डिसाइटिसको शल्यक्रिया गरी स्वास्थ्योपचार गराइरहेको छु । यतिबेला मेरो स्वास्थ्य तीब्र गतिमा सुधार भइरहेको छ , उनले लेखेका छन् , स्वास्थ्यस्थितिबारे चासो राख्नुहुने, शुभेच्छा प्रकट गर्नुहुने सम्पूर्ण दाजुभाइ तथा दिदीबहिनीहरुमा हार्दिक धन्यवाद व्यक्त गर्दछु ।
प्रकाशित मिति: बिहीबार, मंसिर १२, २०७६
-1732776560.jpg)
