काठमाडौं । बाढीपछि बिहीबार पनि सेयर बजारमा निर्जीवन बीमा समूहमा भारी गिरावट आएको छ। अघिल्लो दिन सबैभन्दा धेरै घटेको यो समूह आज पनि २.०४ प्रतिशतले घटेको हो।
बाढीपछि दुई दिनमा निर्जीवन बीमा समूह करिब ६ प्रतिशतले घटिसकेको छ। तिब्बतबाट आएको भीषण बाढीका कारण एक दर्जनभन्दा बढी जलविद्युत् आयोजना, सयौँ सवारीसाधन तथा भवनमा क्षति पुगेपछि त्यसको क्षतिपूर्तिको भार निर्जीवन बीमा कम्पनीमा पर्ने अनुमानले लगानीकर्तामाझ नकारात्मक प्रभाव परेको हो।
बिहीबार नेप्से परिसूचक भने १.०४ अंक अर्थात् ०.०४ प्रतिशतले घटेर २ हजार ५५७ अंकमा कायम भएको छ। आज १४६ कम्पनीको सेयर मूल्य बढ्दा ११८ कम्पनीको घटेको छ भने १५ कम्पनीको मूल्य स्थिर रह्यो।
कारोबार रकम पनि घटेको छ। अघिल्लो दिन ४ अर्ब ७७ करोड रुपैयाँको कारोबार भएकोमा आज ३ अर्ब ७८ करोड रुपैयाँको कारोबार भयो।
निर्जीवन बीमासँगै जलविद्युत् समूह ०.५५, जीवन बीमा ०.२४ र अन्य समूह १.०७ प्रतिशतले घटेका छन्।
यता बैंकिङ ०.१४, विकास बैंक ०.४४, फाइनान्स ०.६६, होटल तथा पर्यटन ०.४१, लगानी ०.१५, उत्पादन तथा प्रशोधन १.७५ र माइक्रोफाइनान्स ०.१२ प्रतिशतले बढेका छन्। सिमेन्ट कम्पनीको मूल्य बढ्दा उत्पादन तथा प्रशोधन समूह सबैभन्दा धेरै बढेको हो।
आज सर्वोत्तम पेन्ट्सको सेयर मूल्य सबैभन्दा धेरै १५ प्रतिशतले बढेको छ। त्यस्तै घोराही सिमेन्ट ८.१९, सोनापुर सिमेन्ट ५.०५, भगवती हाइड्रोपावर ४.७२, पाल्पा सिमेन्ट ४.५३ र शिवम् सिमेन्ट ४.१७ प्रतिशतले बढेका छन्।
अपर हेवाखोला जलविद्युत् कम्पनीको सेयर मूल्य ९.४५ प्रतिशतले घटेको छ। त्यस्तै त्रिशूली जलविद्युत् ०.२३, इमर्जिङ नेपाल ८.३८, रसुवागढी हाइड्रोपावर ८.३८ र माथिल्लो मैलुङखोला जलविद्युत् ८ प्रतिशतले घटेका छन्।
आज सबैभन्दा धेरै कारोबार हुने कम्पनीमा शिवम् सिमेन्ट, एसबीआई बैंक, चिलिमे हाइड्रोपावर, आँखुखोला जलविद्युत् र रिलायन्स स्पिनिङ मिल्स रहेका छन्।
प्रकाशित मिति: बिहीबार, भदौ ११, २०८३
-1787133994.jpg)
-1787729040-1787822224.jpeg)
-1787729040-1787815274.jpeg)