झापा : झापाका २२ बालबालिकामा अटिज्मको समस्या देखिएको छ । अटिज्म केयर नेपाल सोसाइटीको तथ्याङ्कअनुसार चार बालिकासहित २२ मा यो समस्या देखिएको हो ।
अटिज्म केयर नेपालका अध्यक्ष कुमार चुडालका अनुसार अटिज्म भएका बालबालिकाका अभिभावक भेला भएर २०७४ देखि यो संस्था सञ्चालनमा छ । अटिज्मका बारे जानकारी दिँदै अध्यक्ष चुडालले भने, कुनै पनि व्यक्तिको मस्तिष्कमा जन्मजात आएको समस्याका कारण उमेरको विकाससँगै अनौठो खालको व्यवहार, लगातार एउटै व्यवहार दोहोर्याउने लगायतका कार्य गर्ने अवस्था नै अटिज्म हो । उनका अनुसार नेपालमा करिब तीन लाख मानिसमा अटिज्मको समस्या रहेको अनुमान गरिएको छ ।
उनले भने, अटिज्म के कारणले हुन्छ अहिलेसम्म पत्तो लाग्न सकेको छैन, अटिज्मको समस्या देखिएका बालबालिकालाई औषधि सेवनबाट पनि निको पार्न नसकिने रहेछ । मेरी छोरी प्रकृतिलाई पनि यही समस्या छ, उनलाई अटिज्मको समस्या भएको दुई वर्षपछि मात्रै थाहा पाएँ, यस्तो समस्या भएका बालबालिकाको स्वभाव फरक हुँदो रहेछ आफ्नै १६ वर्षीया छोरीको उदाहरण दिँदै उनले भने, हातमा केही वस्तु बोक्न नपाउँदा रुने, कराउने, चिच्याउने, झट्ट हेर्दा जो कोहीले मानसिक सन्तुलन गुमाएको भन्न पछि पर्दैनन्, तर प्रकृतिले न त मानसिक सन्तुलन गुमाइन् न त उनको मस्तिष्कको विकास नै भयो ।
आज अटिज्म दिवस अर्थात् अप्रिल २ अटिज्मका बारेमा समाजमा जनचेतना जगाउने उद्देश्यले संयुक्त राष्ट्रसङ्घले सन् २००८ देखि जनचेतना दिवस मनाउँदै आएको छ । झापामा पनि आज यो दिवस मनाउने तयारी गरिएको अध्यक्ष चुडालले बताए । -रासस
-1732776560.jpg)
