काठमाडौं : गीत, गजल र शीतलको नवौँ शृंखला शनिबार राजधानीमा संपन्न भएको छ ।
कुञ्ज नाटक घरमा भएको कार्यक्रममा कवि एवं गीतकार श्रवण मुकारुङले आफ्ना आधा दर्जन बढी गीत सुनाए भने गजलकार सुमन स्मारिकाले आधा दर्जन बढी गजल सुनाइन् ।
कार्यक्रममा लोकप्रिय युवासंगीतकार सुरेश गैरेलाई सम्मान गरिएको थियो । उनले आफ्ना आधा दर्जन गीतसमेत सुनाए । सम्मानित गैरेले साहित्य र संगीत भनेको संगत रहेछ भन्दै आफूलाई नयाँ पुस्ताका गजलकारहरूले सधैँ उत्प्रेरित बनाएको बताए । उनले नयाँ पुस्तासँग सहकार्य गर्न चाहेको पनि उल्लेख गरे ।
कवि श्रवण मुकारुङले आफ्ना आफूलाई गजल लेख्न नआए पनि गजलको पारखी भएको उल्लेख गर्दै गजलबारे बजारमा अनेक टीकाटिप्पणी हुने गरेका तर गजलबारे नकारात्मक टीकाटिप्पणी गर्नेहरू देख्दा दया लाग्ने गरेको सुनाए । उनले नकारात्मक टिप्पणी गर्नुभन्दा गजलबारे अध्ययन गर्न जरुरी रहेको उल्लेख गरे ।
कार्यक्रमको सहजीकरण गजलकार तथा गीतकार शीतल कादम्बिनीले गरेकी थिइन् ।
प्रकाशित मिति: आइतबार, वैशाख २९, २०७६ १९:२१
