काठमाडौँ । जनता समाजवादी पार्टी (जसपा)को आधिकारिकतासम्बन्धी विवादबारे टुङ्गो लगाउन निर्वाचन आयोगको इजलासले आज अन्तिम बहस गर्दै छ ।
जसपाका अध्यक्ष उपेन्द्र यादवले आधिकारिकता दाबी गर्दै निर्वाचन आयोगमा निवेदन दिएपछि अर्का अध्यक्ष महन्थ ठाकुरले पनि दाबी पेस गरेका थिए ।
आयोगले दुवै अध्यक्षको विवाद मिलाउन इजलास गठन गरी साउन ३ गतेदेखि बहस गरिरहेको छ । पहिलो चरणको बहस सकिएपछि दुवै पक्षलाई आ–आफ्नो सक्कल प्रमाणपत्र पेस गर्न आदेश दिएको थियो ।
दुवै पक्षका अधिवक्ताहरूले २/२ घण्टा बहस गर्नेछन् । त्यसपछि बहसनोट दिनेछन् । आयोगको इजलासमा बहस सकिएपछि सम्भवतः आजै आदेश आउन सक्ने आयोगले जनाएको छ।
तत्कालीन प्रधानमन्त्री केपी शर्मा ओली सरकारलाई ठाकुर पक्षले समर्थन गरेपछि यादव र ठाकुरपक्षबीच विवाद बढेको थियो।
प्रकाशित मिति: बिहिबार, साउन ७, २०७८, १२:२९:००
