काठमाडौं । प्रतिनिधिसभाको राज्य व्यवस्था तथा सुशासन समितिले पारित गरेको निजामती कर्मचारी विधेयकको विरोधमा सरकारी कर्मचारी आन्दोलित भएका छन् ।
विधेयक वृत्तिविकास विरोधी रहेको भन्दै नायब सुब्बा तहका सरकारी कर्मचारी विरोधमा उत्रिएका हुन् । उनीहरुले सिंहदरबारमा रहेको संघीय मामिला तथा सामान्य प्रशासन मन्त्रालयअगाडि उभिएर विरोध प्रदर्शन गरेका हुन् ।
विरोधमा निजामती सेवामा नासु बचाउ अभियान र निजामती सेवाका राजपत्र अनंकित कर्मचारीहरू सहभागी छन् ।
तृतीय श्रेणी शाखा अधिकृत सरहको पदपूर्तिमा ५० प्रतिशत खुल्ला, ३० प्रतिशत बढुवा र २० प्रतिशत आन्तरिक प्रतिस्पर्धाको व्यवस्था हुनु पर्ने माग उनीहरुको छ ।
कुनै पनि साविकको पदबाट अधिकतम १२ वर्षसम्म पनि बढुवा नभएमा स्वतः बढुवा प्रणालीबाट पदपूर्ति गरेर मात्र खुलातर्फ विज्ञापन गर्नुपर्ने माग पनि उनीहरुले राखेका छन् ।
प्रकाशित मिति: मंगलबार, असार १६, २०७७ ०८:०२
