काठमाडौं । सत्तारुढ नेपाल कम्युनिस्ट पार्टी (नेकपा) को स्थायी कमिटीको चौथो दिनको बैठक सुरू भएको छ ।
प्रधानमन्त्री निवास बालुवाटारमा सुरु भएकाे बैठकमा कोभिड-१९ को रोकथाम र नियन्त्रणमा सरकारले गरेको काम र समग्र सरकारको कामको समीक्षाका बारेमा छलफल केन्द्रित हुने बताइएको छ ।
यसअघिका बैठकमा सीमा विवादको एजेन्डामा केही सचिवालय सदस्यबाहेक धेरैले धारणा राखिसकेकाले आज थप सदस्यले आफ्नो धारणा राखी बाँकी एजेन्डामा प्रवेश गर्ने स्थायी समिति सदस्य रघुजी पन्तले जानकारी दिए ।
बैठकमा अध्यक्ष एवं प्रधानमन्त्री केपी ओलीले आफूलाई पदबाट हटाउन भारतसहित नेपालका नेताहरु लागिपरेको दाबी गरेपछि नेताहरुले उनीसँग जवाफ माग गर्ने तयारी छ ।
शुक्रबारको बैठकमा अनुपस्थित भएका प्रधानमन्त्री केपी शर्मा ओली आजकाे बैठकमा उपस्थित भएका छन् । शुक्रबार उनी उपस्थित नै भएका थिएनन् भने शनिबारको बैठकमा केहीबेर बसेर निस्किएका थिए ।
यसैबीच बैठकअघिप्रधानमन्त्री केपी शर्मा ओली राष्ट्रपति विद्यादेवी भण्डारीलाई भेट्न शितल निवास पुगेका थिए । समसामयिक विषयमा छलफल गर्न प्रधानमन्त्री मंगलबार शितल निवास पुगेका हुन् ।
राष्ट्रपतिका स्वकीय सचिव भेषराज अधिकारीका अनुसार समसामयिक विषय कुरा गर्न उनीहरुको नियमित भेटघाट भएकाे हो ।
प्रकाशित मिति: मंगलबार, असार १६, २०७७ ०६:३७
