काठमाडौँ । कांग्रेसका पूर्वसभापति एवं पूर्वप्रधानमन्त्री गिरिजाप्रसाद कोइरालाको १० औं स्मृति दिवसका अवसरमा मास्क र स्यानिटाइजर वितरण गरिएको छ ।
नेविसंघ स्याङ्जा–काठमाडौँ सम्पर्क समितिले शुक्रबार नयाँ बानेश्वर चोकमा २ हजार ५ सय मास्क र ५० स्यानिटाइजर वितरण गरेको हो ।
कार्यक्रममा नेविसंघका महामन्त्री बलदेव तिमल्सेनाले विश्वव्यापीरुपमा फैलँदै गएको कोरोना भाइरसबारे आफ्नो संगठनले देशभर जनचेतनामूलक कार्यक्रम सञ्चालन गर्ने बताए । 'कोरोनाको बारेमा सचेतना प्रदान गर्न नेविसंघ देशभरका सम्पूर्ण विद्यालय र क्याम्पसमा पुग्छ', उनले भने ।
नेविसंघका अर्का महामन्त्री युवराज पाण्डेले कोरोनालाई देखाएर बजारमा अत्यावश्यक वस्तुको कृत्रिम अभाव सिर्जना गर्न नहुने बताए । 'दुःखको बेला हातेमालो गरेर अगाडि बढ्नुपर्छ, कृत्रिम अभाव सिर्जना गर्नेलाई सरकारले तत्काल कारबाही गर्नुपर्छ', उनले भने ।
नेविसंघ स्याङ्जा–काठमाडौँ सम्पर्क समिति अध्यक्ष इन्जिनियर दीपेन्द्र क्षेत्रीले बजारमा अत्यावश्यक सामग्रीको अभाव हुँदै गएका बेलामा थोरै भए पनि रोकथामका लागि सहयोग पुर्याउने उद्देश्यले मास्क वितरण समारोह आयोजना गरिएको बताए ।
नेविसंघ केन्द्रीय समितिले स्व कोइरालाको दसौं स्मृति दिवसका अवसरमा शुक्रबार साँझ २५ जनाभन्दा धेरै मानिस जम्मा नभई देशभरका जिल्ला तथथा क्याम्पस समितिलाई दिप प्रज्वलन गर्न निर्देशन दिएको छ । रासस
प्रकाशित मिति: शुक्रबार, ७ चैत २०७६
