काठमाडौं । निवर्तमान भौतिक पूर्वाधार तथा यातायातमन्त्री रघुवीर महासेठबारे आएको समाचारप्रति उनको निजी सचिवालयले आपत्ति जनाएको छ ।
१८ गते बुधबार लोकान्तर डट कममा ‘सवारी फिर्ता गरेनन् महासेठले’ शीर्षकको समाचार प्रकाशित भएको थियो । सोही समाचारको खण्डन गर्दै महासेठको सचिवालयले प्रेस विज्ञप्ति जारी गर्दै आपत्ति जनाएको हो । महासेठका स्वकीय सचिव उज्जैन सिंहद्वारा जारी विज्ञप्तिमा समाचार मनगढन्ते र चरित्र हत्या गर्ने मनसायले लेखिएको उल्लेख छ ।
‘प्रकाशित समाचारमा कुनै सत्यता नरहेको स्पस्ट पार्दै उक्त कपोलकल्पित समाचारले पूर्वमन्त्री रघुवीर महासेठ र माननीय जुलीकुमारी महतोको चरित्रहत्या गर्ने दुर्नियत मात्रै राखिएकाले त्यसको खण्डन गर्दछौँ’, विज्ञप्तिमा लेखिएको छ, ‘माननीय पूर्वमन्त्री रघुवीर महासेठज्यू मन्त्री पदमा बहाल रहँदा उहाँलाई मन्त्रालयका तर्फबाट जम्मा २ वटा गाडी उपलब्ध गराइएको थियो । मन्त्रीको हैसियतमा राजधानीबाहिर जाँदा मन्त्रालय मातहतका निकायले तत् ठाउँमा बसुन्जेल सवारी साधन उपलब्ध गराउनेबाहेक औपचारिक रुपमा उहाँलाई मन्त्रालयका तर्फबाट प्राप्त जम्मा सवारीसाधन २ वटा रहेको पुनः जानकारी गराइन्छ ।’
त्यसैगरी समाचार तयार गर्दा पुष्टि गर्नका लागि सचिवालयमा या स्वयं महासेठलाई समेत एक पटक पनि नसोधेको जनाइएको छ । ‘मंसिर ४ गते राति मन्त्रिमण्डल हेरफेर भई भौतिक पूर्वाधार मन्त्रालयमा नयाँ मन्त्रीको आगमन भएको भोलिपल्ट अर्थात् ५ गते बिहान ८ बजे नै मन्त्रीका लागि उपलब्ध गराइएको झण्डावाला गाडी फिर्ता गरिसकिएको हो’, विज्ञप्तिमा भनिएको छ, ‘अर्को गाडी र अन्य सबै सेवा सुविधा ६ गते मन्त्रालयमा फिर्ता बुझाइएको थियो । यति मात्रै होइन मन्त्रीबाट हटेको ४ दिनभित्र मन्त्री भएपछिको सम्पति विवरण समेत प्रधानमन्त्री तथा मन्त्रिपरिषदको कार्यालयमा उहाँको सचिवालयका तर्फबाट बुझाइसकिएको छ ।’
नयाँ मन्त्रीको शपथ मंसिर ५ गते ११ बजे हुनुभन्दा ३ घण्टा अघि नै झण्डावाला गाडी बुझाइसकेको यथार्थलाई तोडमरोड गर्दै जुन कपोलकल्पित समाचार तयार गरिएको भन्दै भ्रमपूर्ण समाचारको विश्वास नगर्न आमपाठकलाई अपिल पनि गरिएको छ ।
‘हामी स्वतन्त्र पे्रसको सम्मान गर्दछौँ तर स्वतन्त्रताको नाममा यसरी नियोजित रुपमा कसैको नितान्त बदनाम गराउने उदेश्यले प्रकाशित कथाहरुको विरोध गर्दछौँ’, विज्ञप्तिमा छ, ‘आफ्नो स्वतन्त्रता उपभोग गर्दा अर्को पक्षको पनि सम्मान गर्ने दायित्वबाट च्यूत नुहुन हामी सम्बन्धित सञ्चारमाध्यमलाई ध्यानकर्षण गराउन चाहन्छौं ।’
हेर्नुहाेस् विज्ञप्तिः
प्रकाशित मिति: बिहीबार, मंसिर १९, २०७६ ०९:१६
