काठमाडौं । कास्की क्षेत्र नम्बर २ मा हुने प्रतिनिधिसभा उपनिर्वाचनका लागि नेपाल कम्युनिस्ट पार्टी (नेकपा) की उम्मेद्वार विद्या भट्टराईले मनोनयन दर्ता गराएकी छिन् भने उनका मुख्य प्रतिस्पर्धी नेपाली कांग्रेसका उम्मेदवार खेमराज पौडेलले पनि उम्मेदवारी दर्ता गराएका छन् ।
पार्टी नेतासहित निर्वाचन कार्यालय पुगेका पौडेलले उम्मेदवारी दर्ता गरेका हुन् । उनले १२:३० बजे मनोनयन दर्ता गराए । पहिले नेकपाकी विद्याले माेनयन दर्ता गराएकी थिइन् भने लगत्तै खेमराजले दर्ता गराए ।
उमेदवारी दर्तापछि विद्याले आफ्नो पार्टीले दिएको जिम्मेवारी पूरा गर्दै निर्वाचित हुनेमा विश्वास व्यक्त गरिन् । हिजोका दिनमा पनि राजनीतिमा आफूले योगदान गरेको उनले बताइन् ।
यसैगरी उम्मेदवारी मनोनयन दर्तापछि खेमराजले पनि आफूले जित्ने दाबी गरेका छन् । अमेरिकी राष्ट्रपति डोनाल्ड ट्रम्पको प्रसंग निकाल्दै पौडेलले आफूले जितेर देखाइदिने दाबी गरे । अमेरिकामा ट्रम्पले जित्छन् भनेर कसले सोचेको थियो र ! उनकाे भनाइ छ ।
यसैगरी कास्की २ मा साझा पार्टीका तर्फबाट रजनी केसी, नेपाली कांग्रेस बीपीका चन्द्रबहादुर रानाभाट, विवेकशील नेपाली जमुना शर्मा र स्वतन्त्रमा कमलजंग कुँवरले पनि उम्मेदवारी दर्ता गराएका छन् ।
तत्कालीन मन्त्रीसमेत रहेका कास्की– २ का सांसद रवीन्द्र अधिकारीको हेलिकप्टर दुर्घटनामा परी निधन भएपछि त्यहाँ उपनिर्वाचन हुन लागेको हो ।
प्रकाशित मिति: बिहीबार, कात्तिक २१, २०७६ ०७:२५
