काठमाडौं : प्रधानमन्त्री केपी शर्मा ओली फ्रान्स जाने भएका छन् । संयुक्त अधिराज्यको औपचारिक भ्रमणमा रहेका ओली बेलायतका विभिन्न कार्यक्रममा सहभागी भएर आज (बुधबार) दिउँसो मित्र राष्ट्र फ्रान्सको औपचारिक भ्रमणमा जाने भएका हुन् ।
प्रधानमन्त्री ओली फ्रान्सका प्रधानमन्त्रीको मैत्रीपूर्ण निमन्त्रणामा आज दिउँसो लण्डनबाट रेल चढेर फ्रान्सको राजधानी पेरिस पुग्ने कार्यक्रम रहेको बताइएको छ ।
यसैबीच प्रधानमन्त्री ओलीसँग संयुक्त अधिराज्यका एशिया प्रशान्त मामिला हेर्ने राज्यमन्त्री मार्ट फिल्डले लण्डनस्थित नेपाली दूतावासमा आजै शिष्टाचार भेटवार्ता गर्ने जनाइएको छ ।
यसैगरी प्रधानमन्त्री ओलीसँग बेलायतको इन्टरनेशनल मेरिटाइम अर्गनाइजेशनका महासचिव, विश्व ऊर्जा परिषद्का वरिष्ठ अधिकारी, एडिनबर्ग रोयल बोटानिकल गार्डेन र वनस्पति विभागका प्रमुखले आजै दिउँसो शिष्टाचार भेट गर्ने कार्यक्रम रहेको जनाइएको छ
। प्रधानमन्त्री ओली आजै आफ्नो स्वागतमा संयुक्त अधिराज्यका लागि नेपाली राजदूत दुर्गाबहादुर सुवेदीले दूतावासमा आयोजना गर्ने समारोहमा पनि सहभागी हुने बताइएको छ ।
प्रकाशित मिति: बुधबार, जेठ २९, २०७६ १७:३९
