काठमाडौं । राष्ट्र, राष्ट्रियता, धर्म, संस्कृति र नागरिक बचाउँ महाअभियानका अध्यक्ष दुर्गा प्रसाईंले सरकारसँग वार्ता गर्न नौ सदस्यीय वार्ता टोली गठन गरेका छन्।
सरकारले प्रधानमन्त्री तथा मन्त्रिपरिषद् कार्यालयका सहसचिव लिलाधर सुवेदीको नेतृत्वमा चार सदस्यीय वार्ता टोली गठन गरेको भोलिपल्ट प्रसाईंले आफ्नो पक्षबाट वार्ता टोली बनाएका हुन्।
भक्तपुरस्थित प्रसाईंको निवासमा बसेको बैठकले विष्णु बोहरा क्षेत्रीको संयोजकत्वमा टोली गठन गरेको हो। टोलीका सदस्यमा विजय थापा, देवी संग्रौला, हरदेव महतो, लीलदेव दनुवार, लाल शाह, रिकु मण्डल, राजु आचार्य र नरेन्द्र लामा रहेका छन्।
सरकारका तर्फबाट सुवेदीको संयोजकत्वमा गृह मन्त्रालयका सहसचिव आनन्द काफ्ले, अर्थ मन्त्रालयका सहसचिव महेश आचार्य तथा भूमि व्यवस्था, सहकारी, संघीय मामिला तथा सामान्य प्रशासन मन्त्रालयका सहसचिव डिलाराम पन्थी सदस्य रहेको टोली गठन गरिएको छ।
प्रसाईंले सबै जातजाति र पक्षको प्रतिनिधित्व सुनिश्चित गर्न आफ्नो पक्षबाट नौ सदस्यीय वार्ता टोली गठन गरिएको बताएका छन्। उनले महाअभियान कुनै सीमित समूहले सञ्चालन नगरेको र यसमा विभिन्न जातजाति तथा सर्वसाधारणको प्रतिनिधित्व रहेको दाबी गरेका छन्।
प्रकाशित मिति: मंगलबार, भदौ २, २०८३
